JESANA
[Daan [nga Ili]].
Maysa a lugar a nadakamat a kadua ti Mizpa kas mangipatuldo iti ayan ti bato nga insaad ni Samuel ken pinanagananna iti “Ebenezer.” (1Sm 7:12) Maysa ti Jesana kadagiti siudad a kinautibo ni Ari Abias ti Juda (980-978 K.K.P.) manipud ken Jeroboam nga ari ti Israel. (2Cr 13:19) Maibilbilang nga isu met laeng ti Isana a tinukoy ni Josephus, a sadiay ti nangparmekan ni Herodes a Dakkel ken Heneral Pappus. (Jewish Antiquities, XIV, 458 [xv, 12]) Agparang a nataginayon ti nagan nga Isana iti Burj el-Isaneh, agarup 8 km (5 mi) iti amianan nga amianan-a-daya ti Bethel. Gapuna naisingasing daytoy a siudad kas posible nga ayan ti kadaanan a Jesana.