JOHANAN

[napaababa a porma ti Jehohanan, kaipapananna ti “Nangipaay ni Jehova iti Parabur; Nakaparparabur ni Jehova”].

Ti nagan a Juan ket nagtaud iti daytoy a Hebreo a nagan.

1. Nasiglat a mangusar iti dua nga imana, nabileg a Benjamita, maysa kadagiti nalaing a mannakigubat a nakikadua ken David idiay Siclag.​—1Cr 12:1-4.

2. Gadita nga opisial, maysa kadagiti 11 a maingel a mannakidangadang nga immay iti dasig ni David idiay let-ang.​—1Cr 12:8, 12-15.

3. Maysa a nangato a padi. Nalabit ti anakna a ni Azarias ti nangato a padi idi sidudursok a nagtignay ni Ari Ozias.​—1Cr 6:9, 10; 2Cr 26:19, 20.

4. Inauna nga anak ni Ari Josias. (1Cr 3:15) Yantangay saan a pulos nadakamat a simmuno iti trono ti Juda, kas iti tallo nga in-inaudi a kakabsatna, natay la ketdi sakbay ti ipapatay ni amana.​—2Ar 23:30, 34; 24:17; Jer 22:11; kitaenyo ti JOSIAS Num. 1.

5. Maysa kadagiti panguluen dagiti puersa militar a nagtalinaed idiay Juda kalpasan a naidestiero ti kaaduan nga umili idiay Babilonia idi kalgaw ti 607 K.K.P. Daytoy nga anak ni Carea ket sisasagana a simmuporta iti pannakadutok ni Gedalias, ket idi naammuanna ti gandat ni Ismael a mangpapatay iti gobernador, nagdawat ken Gedalias iti pammalubos a sililimed a papatayenna ni Ismael ngem saan a napatgan dayta. (Jer 40:7, 8, 13-16) Napapatay ni Gedalias, ket indauluan ni Johanan ti buyot a mangibales iti ipapatay ti gobernador. Nabawina dagiti tattao a kinautibo ti mammapatay a ni Ismael, ngem nakatalaw dayta ket napan idiay Ammon. (Jer 41:11-16) Ni Johanan ken ti sabsabali pay nagimtuodda ken mammadto Jeremias no ania ti rumbeng nga aramidenda gapu ta mabutengda iti tignay nga isupapak dagiti taga Babilonia. Imbes a surotenda ti balakad ni Jehova nga agtalinaedda iti daga, nagkamangda idiay Egipto ket inkuyogda ni Jeremias.​—Jer 42:1–43:7; 2Ar 25:23-26.

6. Anak ni Hacatan ken pannakaulo ti 110 a lallaki manipud sangakabbalayan ni Azgad iti dasig ti amana, isuda a kaduana a nagsubli idiay Jerusalem, a kimmuyogda ken Esdras idi 468 K.K.P.​—Esd 8:1, 12.

7. Apoko ni Eliasib, ti nangato a padi a nagbiag idi tiempo ni Nehemias. Naawagan Jonatan iti Nehemias 12:11 nalabit gapu iti biddut ti eskriba, agsipud ta ti nagan a “Johanan” ken “Jonatan” ket agkaasping unay iti Hebreo. Ni Johanan ket nadakamat iti Nehemias 12:22, 23 ken iti maysa a surat a karaman iti Elephantine Papyri, a sadiay naawagan kas nangato a padi.​—Jewish Antiquities, ni F. Josephus, XI, 297 (vii, 1).

8. Anak ni Elioenai; agparang ni Johanan iti maysa a listaan ti sangakabbalayan ni David a mangiraman ken Zorobabel ken ti kapkaputotanna.​—1Cr 3:1, 10, 19, 24.