GEDALIAS
[Naindaklan ni Jehova].
1. Levita a kumakanta a nadutokan babaen ti panagbibinnunot idi tiempo ni David a mangaywan iti maikadua kadagiti 24 a bunggoy ti panagserbi, nga addaan iti 12 a musikero ti kada grupo.—1Cr 25:3, 9, 31.
2. Apong ni mammadto Sofonias ken posible a kaputotan ni Ari Ezekias.—Sof 1:1.
3. Anak ni Pasur; maysa kadagiti prinsipe idiay Jerusalem a nangakusar ken Jeremias iti saklang ni Ari Zedekias ken nangidagadag a mapapatay ni Jeremias gapu ta pakpakapuyenna dagiti mannakigubat a lallaki ken amin dagiti umili. Idi impabiang kadakuada ti ari dayta a banag, dagitoy a prinsipe impisokda ni Jeremias iti napitak a pagurnongan ti danum.—Jer 38:1-6.
4. “Anak ni Ahicam nga anak ni Safan.” Kalpasan ti pannakadadael ti Jerusalem idi 607 K.K.P., ni Ari Nabucodonosor dinutokanna ni Gedalias kas gobernador kadagiti Judio a nabatbati iti daga ti Juda. Idiay Mizpa nga imbangon ni Gedalias ti pagtaenganna, ket ditoy a nagnaed ni mammadto Jeremias. Kalpasanna, idi a dagiti saan a nakautibo a Judeano a panguluen ti militar nangngegda a nadutokan ni Gedalias kas gobernador, immayda kenkuana idiay Mizpa a kaduada dagiti lallakida. Insapata kadakuada ni Gedalias a sigurado nga aglak-amda iti naimbag no la ket ta itultuloyda ti agserbi iti ari ti Babilonia, ket pinaregtana ida nga agurnong iti arak, lana, ken bungbunga iti kalgaw. Uray dagiti Judio a naiwarawara idiay Moab, Ammon, Edom, ken dadduma pay a lugar ket nagtultuloy ti iyaayda ken Gedalias.
Amin dagitoy ket nalawag a saan a nagustuan ni Baalis nga ari ti Ammon, a nagballigi a nangallukoy ken Ismael a makitinnulong iti gakat a panangpapatay ken Gobernador Gedalias. Idi naammuan dayta ni Johanan ken ti dadduma pay a panguluen dagiti puersa militar, impakaammoda daytoy iti gobernador, ngem saan a namati kadakuada. Nakisarita pay ni Johanan ken Gedalias iti pribado ket intukonna a lapdanna ti gandatda babaen ti panangpapatayna ken Ismael. Ngem saan nga impangag ni Gedalias, a pagarupenna nga ulbod ti ibagbagada maipapan ken Ismael. Isu a saan a nagan-annad ni Gedalias idi immay idiay Mizpa ni Ismael ken ti sangapulo a sabsabali pay a lallaki. Nagkakaanda; ket bayat a mangmanganda, timmakder ni Ismael ken ti kakaduana a lallaki ket pinapatayda ni Gedalias kasta met dagiti amin a Judio ken Caldeo a naikuyog ken Gedalias.—2Ar 25:22-25; Jer 39:14; 40:5–41:3.
5. Maysa kadagiti papadi idi tiempo ni Esdras a karaman kadagidiay nangala iti ganggannaet nga assawa a babbai ken nangikari a pagtalawenda ida.—Esd 10:18, 19.