JAAZANIAS

[Ni Jehova Dimngeg].

Idi agpatinggan ti pagarian ti Juda, agparang a kadawyan laengen daytoy a nagan; amin nga uppat a lallaki a nadakamat iti Biblia a kastoy ti naganda ket nagbiag bayat daytoy ababa a periodo ti tiempo. Ti nagan ket nasarakan met iti Surat ti Laquis numero I, ket iti maysa a selio a nasarakan idiay Tell en-Nasbeh agparang ti sasao a “Yaʼazanyahu, adipen [opisial] ti ari.” (The Biblical Archaeologist, 1947, p. 71) Nupay kasta, awan ti direkta a pammaneknek a ti kasta a kitikit ket ipatuldona ti asinoman kadagiti sumaganad a tattao.

1. Panguluen dagiti Recabita a sinubok ni mammadto Jeremias, sigun iti bilin ni Jehova, babaen ti panangipanna kadakuada iti maysa kadagiti panganan a siled iti templo ken ti panangitukonna kadakuada iti arak nga inumen. Ngem nagkedkedda, kas panagtulnogda iti bilin kadakuada ni amada a Jonadab (Jehonadab) nga anak ni Recab nasurok a dua a siglon ti napalabas. Maigapu itoy, inkari ni Jehova: “Manipud ken Jonadab nga anak ni Recab awanto ti magessat a maysa a lalaki nga agtakder iti sanguanak a kanayon.” Ni Jaazanias ket anak ti sabali pay a Jeremias.​—Jer 35:1-10, 19.

2. Anak ni Safan; ti kakaisuna nga indibidual a nainaganan iti sirmata ni Ezequiel (612 K.K.P.) maipapan kadagiti 70 a lallaki a nagidaton iti insienso iti sanguanan dagiti naikitikit nga idolo iti templo idiay Jerusalem.​—Eze 8:1, 10, 11.

3. Anak ni Azur; maysa kadagiti 25 a lallaki a nakita iti sirmata ni Ezequiel a sitatakder iti makindaya a ruangan ti templo ni Jehova. Ni Jaazanias ken dagiti kakaduana ‘mangganggandatda iti panangpasakit ken mangibalbalakadda iti dakes a pammatigmaan maibusor iti daytoy a siudad,’ ket naibilin ken Ezequiel nga agipadto maibusor kadakuada.​—Eze 11:1-4.

4. Maysa a panguluen ti puersa militar ti Juda iti ababa a periodo a dagus a simmaruno kalpasan a ti Jerusalem ket dinadael dagiti taga Babilonia. Ni Jaazanias (Jezanias, ti ispeling ti naganna no dadduma) ket maysa kadagiti sumagmamano a sidadaan a nangsuporta iti pannakadutok ni Gobernador Gedalias. (2Ar 25:23; Jer 40:7, 8) Mabalbalin nga isu ket karaman idi “amin a papanguluen dagiti puersa militar” pinakdaaranda ni Gedalias maipapan iti pananggandat ni Ismael iti biagna. Kalpasan ti panangpapatay ni Ismael ken Gedalias, mabalin met a maysa kadagidiay kimmamat ken Ismael ken nangbawi kadagidiay kinautibona. (Jer 40:13, 14; 41:11-16) Maysa ni Jezanias kadagiti papanguluen a nagimtuod ken Jeremias no ania ti maaramid kalpasan dayta a pasamak, ngem imbes a surotenda ti balakad ti mammadto, indauluanda dagiti sumagmamano a nabatbati ket nagturongda idiay Egipto. (2Ar 25:26; Jer 42:1-3, 8; 43:1-5) “Ni Azarias nga anak ni Osaias” ket mabalin a kabsat ni Jaazanias, ngem mabalbalin nga isu met laeng dayta.​—Jer 43:2.