RECABITA, DAGITI

[Ken (Kukua ni) Recab].

Dagiti kaputotan ni Recab a Keneo babaen ken Jehonadab.​—Jer 35:6; 1Cr 2:55.

Idi tiempo ni Jehonadab, agparang nga agnanaed ti sumagmamano a Recabita iti makin-amianan a pagarian, ta sadiay a nakikadua ni Jehonadab ken Ari Jehu (nagturay agarup 904-877 K.K.P.) iti panangdadael iti panagdaydayaw ken Baal ken “amin a natedda a kukua ni Acab idiay Samaria.” (2Ar 10:15-17) Nangted ni Jehonadab iti bilin iti pamiliana (saan a nadakamat no sakbay wenno kalpasan ti pannakikaduana ken Jehu) nga agnaedda kadagiti tolda, a saanda nga agmula iti bin-i, saanda nga agmula iti kaubasan, ken saanda nga uminum iti arak, agsipud ta ganggannaetda nga agnanaed iti daga.​—Jer 35:6-10.

Iti maudi a paset ti panagturay ni Jehoiaquim (628-618 K.K.P.) adu a Recabita ti nagnaed idiay Juda. Idi immay ni Nabucodonosor maibusor iti daga, simrek dagiti Recabita iti Jerusalem tapno masalaknibanda manipud kadagiti Caldeo ken Sirio. Imbilin ni Jehova nga ipan ni Jeremias da Jaazanias a panguluenda ken amin dagiti Recabita iti maysa a siled a panganan idiay templo. (Jer 35:1-4) Saan nga adu ti bilangda agsipud ta immanayda amin iti maysa kadagiti siled a panganan ti templo. Tinungpal ni Jeremias ti bilin ti Dios a mangikabil kadagiti kopa ti arak iti sanguananda ket kinunana: “Uminumkayo iti arak.” Nagkedkedda nga uminum gapu iti panagraemda iti bilin ni Jehonadab nga inapoda, ket inlawlawagda a pinanawanda dagiti toldada tapno agnaedda iti siudad gapu laeng kadagiti rumaraut a buyot.​—Jer 35:5-11.

Naay-ayo ni Jehova iti impakitada a panagraem ken panagtulnog. Ti di maisin a panagtulnogda iti tao nga amada ket kasungani ti panagsukir dagiti umili ti Juda iti Namarsuada. (Jer 35:12-16) Inkari ti Dios a gunggonaanna dagiti Recabita: “Manipud ken Jonadab nga anak ni Recab awanto ti magessat a maysa a lalaki nga agtakder iti sanguanak a kanayon.”​—Jer 35:19.

Bayat ti kinagobernador ni Nehemias kalpasan ti pannakaidestiero, “ni Malkias nga anak ni Recab” tinarimaanna ti Ruangan dagiti Gabsuon a Dapo. No daytoy a Recab isu met laeng daydi ama wenno inapo ni Jehonadab, ipakitana a nakalasat dagiti Recabita iti pannakaidestiero ket nagsublida iti daga. (Ne 3:14) Iti 1 Cronicas 2:55, nailanad ni Hamat kas “ama ti balay ni Recab.”