KEDES

[Nasantuan a Disso].

1. Maysa a siudad iti makin-abagatan a Juda (Jos 15:21, 23), mabalin nga isu met laeng ti Cades-barnea.​—Kitaenyo ti CADES, CADES-BARNEA.

2. Maysa a siudad ti Neftali a naited kadagiti Gersonita ken nailasin kas siudad a pagkamangan. (Jos 20:7; 21:32, 33; 1Cr 6:71, 76) Gapu iti disso nga ayanna, naawagan met iti “Kedes-neftali” (Uk 4:6) ken “Kedes idiay Galilea.” (Jos 20:7) Mabalbalin a ti Kedes ti pagnanaedan idi ni Ukom Barak, ket nagpaay dayta kas disso a naguummongan ti 10,000 a lallakina manipud Neftali ken Zabulon sakbay ti panagballigida maibusor iti buyot dagiti Canaanita iti sidong ni Sisera. (Uk 4:6, 10) Adu a siglo kalpasanna, ti siudad ket pinarmek ni Ari Tiglat-pileser III ti Asiria bayat ti panagturay ni Ari Peca ti Israel (a. 778-759 K.K.P.).​—2Ar 15:29.

Maikunkuna a ti Kedes isu ita ti Tell Qades (Tel Qedesh), munturod a tumantannawag iti maysa a bassit, nadam-eg a tanap nga agarup 20 km (12 mi) iti abagatan a laud ti Dan.

3. Maysa a disso iti Isacar a naituding iti “annak ni Gersom” (1Cr 6:71, 72), agparang nga isu met laeng ti “Kision” a nadakamat iti pumadpada a listaan iti Josue 21:28. Maikunkuna a posible a dayta ita ti Tell Abu Qedeis (Tel Qedesh), agarup 4 km (2.5 mi) iti abagatan a daya ti Megiddo. Kasla maikanatad daytoy iti Josue 12:21, 22, a sadiay ti Kedes agparang a masarakan iti aglawlaw ti Megiddo ken Jocneam. Yantangay ni Barak pinarukmana ni Sisera idiay Megiddo (Uk 5:19), mabalin nga iti asideg daytoy a Kedes (saan a ti Num. 2) a ni Sisera a panguluen ti buyot dagiti Canaanita ket pinapatay ni Jael iti toldana.​—Uk 4:11, 17, 21.