COHATITA

[Ken (Kukua ni) Cohat].

Kaputotan ti ulo ti pamilia a ni Cohat, a maysa kadagiti tallo nga annak ni Levi. (Ge 46:11; Nu 26:57) Nabingbingay dagiti “Cohatita” wenno “annak ni Cohat” iti uppat a pamilia, a dagitoy ket kapkaputotan ti uppat nga annak ni Cohat: dagiti Amramita, dagiti Izarita, dagiti Hebronita, ken dagiti Uzzielita. (Nu 3:19, 27) Ni Elizafan nga anak ni Uzziel ti panguluenda idi tiempo ti panagpakarso ti Israel idiay Bantay Sinai (1513 K.K.P.).​—Nu 3:30.

Da Moises ken Aaron ket Cohatita a kameng ti Amramita a pamilia (Ex 6:18, 20); ti rebelioso a ni Kore ket Cohatita a kameng ti pamilia dagiti Izarita (Nu 16:1), kas met ken matalek a mammadto Samuel.​—1Sm 1:1, 19, 20; 1Cr 6:33-38.

Imbatad ti panagsensus idiay Let-ang ti Sinai nga adda 8,600 a lallaki nga agedad iti maysa a bulan ken agpangato a kameng ti pampamilia dagiti Cohatita. (Nu 3:27, 28) Sigun iti sumagmamano a manuskrito ti Griego a Septuagint, ti bilang ket 8,300. No ti basbassit a bilang mainayon iti 7,500 ken iti 6,200 iti Numeros 3:22, 34, agdagup dayta iti 22,000​—ti mismo a bilang a masarakan iti Numeros 3:39. Ti lallaki a kamengda nga agedad iti nagbaetan ti 30 ken 50 a tawen a “simrek iti bunggoy dagiti agserbi a maipaay iti panagserbi iti tolda ti gimong” ket nagdagup iti 2,750.​—Nu 4:34-37.

Bayat ti panagdaliasatda idiay let-ang, naituding nga agpakarso dagiti Cohatita iti makin-abagatan a sikigan ti tabernakulo (Nu 3:29), iti nagbaetan ti tabernakulo ken ti pakarso dagiti tribu da Ruben, Simeon, ken Gad. (Nu 2:10, 12, 14) Pribilehio ken pagrebbengan dagiti Cohatita nga idaliasat ti lakasa ti tulag, ti lamisaan ti tinapay ti pamarang, ti pagsaadan ti silaw, dagiti altar, ken dagiti aruaten ti nasantuan a disso, kasta met ti tabing ti Kasasantuan (Nu 3:30, 31), kalpasan a maipempen ken maabbongan dagitoy ni Aaron ken ti annakna, a Cohatita met. Dagiti Cohatita, malaksid ken Aaron ken ti annakna, saanda a napalubosan a mangkita kadagita nga aruaten uray no apagkanito laeng wenno uray mangsagid iti nasantuan a disso, ta ti panangaramidda iti kasta ket agbanag iti ipapatayda. (Nu 4:4-15, 20) Nupay ti Israel impaayanna dagiti Levita iti bakbaka ken karkareson a pangidaliasat iti alikamen ti tabernakulo, awan ti aniaman a pagidaliasat a naited kadagiti Cohatita. Awan duadua a gapu iti kinasagrado dagiti awitda, inawitda dagita iti abagada. (Nu 7:2-9) Isuda idi ti maudi kadagiti Levita nga agluas manipud iti nagpakarsuan.​—Nu 10:17-21.

Kalpasan ti pannakaparmek ti Canaan, idi naituding kadagiti Levita ti sumagmamano a siudad, immawat dagiti Cohatita iti 23; naituding iti “annak” ni Aaron (kayatna a sawen, dagiti Cohatita) ti 13 a siudad manipud kadagiti teritoria ti Juda, Simeon, ken Benjamin, ket naituding iti dadduma pay a Cohatita ti 10 a sabali pay a siudad manipud kadagiti teritoria ti Efraim, Dan, ken ti kagudua a tribu ni Manases.​—Jos 21:1-5, 9-26; 1Cr 6:54-61, 66-70.

Ni Heman a maysa a Cohatita iti pamilia ni Izar ket inikkan ni David iti paset mainaig iti panagkanta iti santuario ni Jehova. (1Cr 6:31-38) Ti sangagasut ket duapulo a Cohatita nga indauluan ni Uriel ket karaman kadagidiay dinutokan ni David a mangipan iti lakasa ni Jehova idiay Jerusalem manipud iti balay ni Obed-edom, nga iti dayta a pasamak dakkel ti akem ni Heman iti musika ken panagkanta. (1Cr 15:4, 5, 11-17, 19, 25) Sigun iti Umuna a Cronicas, idi biningbingay ni David dagiti Levita kadagiti batang wenno benneg, ti sumagmamano a Cohatita ket kumakanta (25:1, 4-6) ken agay-aywan iti ruangan (26:1-9); ti dadduma ket nagaywan kadagiti pempen ken bambanag a napagsanto (26:23-28); ket ti sumagmamano nagakemda kas opisial, uk-ukom, ken administrador. (26:29-32) Ti sumagmamano a Cohatita inasikasoda ti panagluto ken ti pannakaisagana ti agtutuon a tinapay maipaay iti Sabbath.​—1Cr 9:31, 32.

Dagiti Cohatita indaydayawda ni Jehova apaman a naammuanda a pagballigienna ti Juda iti pannakigubat ni Jehosafat maibusor kadagiti nagtitipon a puersa ti Ammon, Moab, ken Seir. (2Cr 20:14-19) Dagiti Cohatita a Levita timmulongda a mangdalus iti balay ni Jehova idi kaaldawan ni Ari Ezekias. (2Cr 29:12-17) Kasta met, dagiti Cohatita a da Zacarias ken Mesullam ket karaman kadagidiay nagakem kas manangaywan idi tinarimaan ni Ari Josias ti templo.​—2Cr 34:8-13.