LIBNA

[nagtaud iti sao a kaipapananna ti “puraw”; wenno, mabalin a, “kayo nga estorake”].

1. Ti nagpakarsuan dagiti Israelita idiay let-ang. Saan nga ammo no sadino ti ayanna.​—Nu 33:20, 21.

2. Naarian a siudad ti Canaan nga innala ni Josue sakbay a pinarmekna ti Laquis. (Jos 10:29-32, 39; 12:15) Ti Libna ket maysa kadagiti siudad iti teritoria ti Juda a naited iti “annak ni Aaron.” (Jos 15:21, 42; 21:13; 1Cr 6:57) Sinigsiglo kalpasanna, nagnaed sadiay ti katugangan a lalaki ni Ari Josias.​—2Ar 23:31; 24:18; Jer 52:1.

Idi tiempo ti iyaalsa ti Edom idi maikasangapulo a siglo K.K.P., nagrebelde met ti Libna maibusor ken Ari Jehoram ti Juda. (2Ar 8:22; 2Cr 21:10) Idi 732 K.K.P., immakar manipud Laquis nga agturong iti Libna ti buyot ni Ari Senaquerib ti Asiria. Kalpasanna, nangibaon iti puersa militar manipud Laquis tapno butbutngenda ti Jerusalem. Bayat nga addada idiay Libna, nakaawat dagiti Asirio kadagiti damag a panggep ni Tirhaca nga ari ti Etiopia ti makidangadang kadakuada. Isu a nangibaon ni Senaquerib kadagiti mensahero iti maikadua a gundaway nga awitda ti pamutbuteng a sursurat ken Ezekias nga ari ti Juda tapno allukoyenna a sumuko ti Jerusalem. Kalpasan dayta, pinapatay ti anghel ni Jehova ti 185,000 iti buyot ti Asiria, a nabatad nga addada pay laeng iti asideg ti Libna nga agpakpakarso.​—2Ar 19:8-35; Isa 37:8-36.

Naikuna a ti Tell es-Safi ket posible nga isu ti kadaanan a Libna. Nupay kasta, gapu ta ad-adu ti pammaneknek a mangipatuldo a ti Tell es-Safi ket isu ti Gat, isu a kunaen met dagiti moderno-aldaw nga eskolar a ti Libna isu ti Tell Bornat (Tel Burena), agarup 8 km (5 mi) iti amianan nga amianan-a-daya ti Laquis.