LOD

Siudad nga addaan iti sakup a babassit nga il-ili a mabalbalin a binangon ti Benjamita a ni Semed, ‘anak’ ni Elpaal. (1Cr 8:1, 12) Kalpasan a nagsubli dagiti Judio manipud pannakaidestiero idiay Babilonia, maysa ti Lod kadagiti kalaudan unay a nagyananda. (Esd 2:33; Ne 7:37; 11:35) Maikunkuna nga isu met laeng ti Lidda, a nangpaimbagan ni Pedro ken Eneas. (Ara 9:32-38) Ti el-Ludd (Lod) adda iti nadam-eg a ginget iti makin-abagatan a murdong ti Tanap ti Saron; agarup 18 km (11 mi) dayta iti abagatan a daya ti Joppe. Idi un-unana, ti siudad masarakan iti nagsapalan ti maibilbilang a kangrunaan a ruta iti nagbaetan ti Egipto ken Babilonia ken ti kangrunaan a dalan manipud Joppe nga agturong idiay Jerusalem. Bayat ti Kadawyan a Panawen, gapu iti daytoy nga estratehiko a nagsaadanna, naipasango ti siudad iti panangrebbek ti buybuyot dagiti Romano, Saraceno, Krusado, ken Mongol.