LISTRA
Maysa a siudad ti Licaonia, rehion iti makin-abagatan a sentro ti Asia Menor. Maikunkuna a ti Listra isu ita ti maysa a munturod iti amianan ti Hatunsaray, nagsaad iti nadam-eg ken nasayaat-pannakapadanumna a disso nga agarup 32 km (20 mi) iti abagatan nga abagatan-a-laud ti Konya (Iconio).
Ni apostol Pablo ken ni Bernabe napanda idiay Listra iti Galacia a probinsia ti Roma kalpasan ti pannakapilitda a pumanaw iti Iconio gapu iti gandat a panangubor kadakuada. Ti siudad agdama idi a kolonia ti Roma, a ni Augusto ti namagbalin iti dayta kas kolonia iti nasapsapa a tiempo. Nupay kasta, dagiti tubo nga umili intultuloyda nga aramaten ti pagsasao a Licaonia. Kalpasan ti panangpaimbag ni Pablo iti maysa a lalaki a pilay sipud pannakayanakna, impapan dagiti bunggoy nga isuda ken Bernabe ket naglasag a didios, da Hermes ken Zeus. Gistay saanda a napawilan dagiti tattao nga agisakripisio kadakuada. Ngem idi agangay, dagiti Judio manipud Iconio ken Antioquia ti Pisidia kasta unay ti pananggutugotda kadagiti agnanaed iti Listra a busorenda ni Pablo ta uray la inuborda ket inulodda ti bagina iti ruar ti siudad, nga impagarupda a natayen. Kalpasan dayta, idi linikmut dagiti padana a Kristiano, timmakder ni Pablo, simrek iti Listra, ket kalpasanna, pimmanaw a kaduana ni Bernabe iti simmaganad nga aldaw sa nagturong idiay Derbe.—Ara 14:1, 5-20.
Kalpasan ti ministerio da Pablo ken Bernabe idiay Derbe, nagsublida idiay Listra, Iconio, ken Antioquia. Pinabileg ken pinaregtada dagiti adalan a naitimpuyog kadagiti kabubuangay a kongregasion Kristiano kadagidiay a siudad ken nangdutokda kadagiti lallakay.—Ara 14:21-23.
Idi agangay, idi narisuten dagiti apostol ken dagiti lallakay iti kongregasion ti Jerusalem ti isyu maipapan iti panagkugit (a. 49 K.P.), sinarungkaran manen ni Pablo ti Derbe ken Listra. Ti pannakadakamat daytoy iti Aramid 16:1 mabalin a tarusan a kayatna a sawen a ti agtutubo a lalaki a ni Timoteo nagnaed idiay Listra wenno iti kabangibang a Derbe. Ngem kas ipakita ti pammaneknek, agparang a ti Listra ti matuktukoy. Ta nupay saanen a nadakamat ti Derbe mainaig ken Timoteo, ti Aramid 16:2 espesipiko a dakamatenna a ni Timoteo “naimbag ti damagna kadagiti kakabsat idiay Listra ken Iconio.” (Kitaenyo met ti 2Ti 3:10, 11.) Nakasaysayaat ti panagrang-ay ni Timoteo ta isu payen ti pinili ni Pablo kas kaduana nga agdaliasat.—Ara 16:3.
Idi simmarungkar ni apostol Pablo iti nadumaduma a lugar iti “pagilian ti Galacia” iti maikatlo a panagdaliasatna kas misionero, mabalin a nagsardeng met idiay Listra.—Ara 18:23.