MAACA

Ti nagan ti sumagmamano a tattao ken ti maysa a pagarian.

[1-9: mabalin a nagtaud iti sao a kaipapananna ti “pespesen”]

1. Ubing a naipasngay ken Nacor, kabsat ni Abraham, babaen ken Reuma a kamalalana. Nabatad a lalaki ti ubing, ta ti maysa a pagarian ken dagiti agnanaed iti dayta naalada ti naganda manipud iti daytoy a tao.​—Ge 22:23, 24; 2Sm 10:6, 8.

2. Asawa ti Manasesita a ni Maquir.​—1Cr 7:14-16.

3. Maysa kadagiti kamalala ni Caleb (ti anak ni Hezron). Impasngayna ti adu kadagiti annak ni Caleb.​—1Cr 2:18, 48, 49.

4. Ti asawa ni Jeiel nga “ama ni Gabaon.”​—1Cr 8:29; 9:35.

5. Maysa kadagiti assawa ni David ken anak a babai ni Talmai nga ari ti Gesur. Isu ti ina ni Absalom.​—2Sm 3:2, 3; 1Cr 3:1, 2.

6. Ama wenno inapo ni Hanan, maysa a nabileg a lalaki kadagiti puersa militar ni David.​—1Cr 11:26, 43.

7. Ama wenno inapo ni Sefatias, maysa a prinsipe ti Israel a nadutokan a panguluen dagiti Simeonita iti panangorganisar ni David iti panagserbi iti ari.​—1Cr 27:1, 16, 22.

8. Ama ni Aquis, ari ti Gat, a nagkamangan dagiti adipen ni Simei iti nasapa a paset ti panagturay ni Solomon. (1Ar 2:39) Daytoy a Maaca mabalin nga isu met laeng ni Maoc iti 1 Samuel 27:2.​—Kitaenyo ti MAOC.

9. Apoko a babai ni Absalom, ti dungdungnguen unay nga asawa ni Ari Rehoboam ti Juda ken ti ina ni Ari Abias (Abiam). (2Cr 11:20-22; 1Ar 15:1, 2, 9, 10) Isu naibilang kas ‘apo a babai’ iti pagarian, yantangay isu ti ina a reyna, agingga ti panangikkat kenkuana ni Ari Asa nga apokona, kas paset ti pannakaisubli ti pudno a panagdaydayaw, “agsipud ta nangaramid iti nakaal-alingget nga idolo maipaay iti sagrado a teddek,” wenno ti Asera. (1Ar 15:9-13; 2Cr 15:16) Isu naawagan Mikaias iti 2 Cronicas 13:2.

10. Nanumo a pagarian nga adda iti makin-amianan a Palestina idi tiempo ti panagsakup dagiti Israelita, naawagan met iti Maacat. Ti teritoria ti tribu ni Manases nabatad a saklawenna koma idi daytoy a lugar, ngem ipakita ti rekord a dagiti Israelita saanda a pinagtalaw dagiti agnanaed iti dayta a daga, iti kasta ‘nagtultuloyda a nagnaed iti tengnga ti Israel.’ (De 3:14; Jos 13:13) Gagangay a nainaig iti kabangibang a pagarian ti Gesur, agparang a ti Maaca masarakan iti amianan dayta a pagarian ken naibeddeng iti rehion ti Basan. (Jos 12:5) Gagangay a maikunkuna a sinaklawna ti makin-abagatan a dardarisdis ti Bantay Hermon a sumalog agingga iti Labneng Hula ken manipud Karayan Jordan nga agpadaya agingga iti ungto ti Desierto ti Siria, wenno kadawyanna a dayta ti makin-amianan a paset ti agdama a distrito ti Golan.

Ti Maaca ket maysa nga Aramaeano (Sirio) a pagarian, a dagiti umilina nalabit nagtaudda ken Maaca nga anak ni Nacor. (Ge 22:24; 1Cr 19:6) Idi a dagiti Ammonita napanda nakigubat ken Ari David, tinangdananda ti ari ti Maaca, agraman ti sabsabali pay, tapno tumulongda kadakuada. Ti bassit a bilang dagiti buyot nga impaay ti Maaca, no idilig kadagiti buyot ti dadduma a kaaliansa, mabalin nga ipasimudaagna ti kinabassit ti pagarian dagiti Maacatita. (2Sm 10:6-8) Ti panagballigi ni Joab maibusor kadagiti Ammonita ken kadagiti kaaliansada a Sirio ket napasarunuan iti sabali pay a panagballigi ni Ari David maibusor kadagiti Sirio. (2Sm 10:13-19) Manipud kadagiti naud-udi a salaysay, agparang a nalabit ti pagarian ti Maaca idi agangay ket inturayan ti pagarian ti Damasco.