MALBA

[Heb., ʼo·rothʹ wenno ʼoh·rothʹ]. Ti pandek a malba ket agdalapdap a mula a dagiti bulongna gistay nagtimbukel, medio umarngi iti bulong ti karabasa, giraygiray ti pingirna ken atiddog dagiti ungkayna. Ti sabsabongna ket nasurok a 1 cm (0.5 pul.) iti pagakabaanna ken nadumaduma ti marisda manipud pusasaw nga asul agingga iti puraw. Ti dippig ken nagsirkulo a napigket a bungbungana ket gagangay a maaw-awagan “keso.”

“Malba” ti pakaipatarusan ti Hebreo a sao nga ʼo·rothʹ (2Ar 4:39; Isa 26:19), maibilbilang a pangadu a porma ti ʼoh·rahʹ, “lawag.” (Est 8:16; Sal 139:12) Sigun iti Lexicon in Veteris Testamenti Libros da L. Koehler ken W. Baumgartner (Leiden, 1958, p. 90), ti ʼo·rothʹ tumukoy iti pandek a malba (Malva rotundifolia). Daytoy a pakabigbigan ket naibatay iti kinapudno a daytoy a mula sensitibo unay iti lawag, ngarud nalabit ti Hebreo nga awag kaipapananna ti “[yerba ti] lawag.” Makan met ti bungana, iti kasta tumunos iti nadakamat iti 2 Ar-ari 4:39.​—LADAWAN, Tomo 1, p. 543.