MEFIBOSET
1. Maysa kadagiti dua nga annak ni Ari Saul ken Rizpa nga anak a babai ni Aya. (2Sm 21:8) Isu ket maysa kadagiti pito a kaputotan ni Saul nga inyawat ni David kadagiti Gabaonita a pangabbong iti pananggandat ni Saul a mangtalipupos kadakuada. (Kitaenyo ti GABAON, DAGITI GABAONITA.) Kalpasan ti panangpapatay dagiti Gabaonita kada Mefiboset ken ti innem a sabsabali pay a kameng ti pamilia ni Saul “iti umuna nga al-aldaw ti panagani, idi panangrugi ti panagani iti sebada” binay-anda ida a nakawalang “iti bantay iti sango ni Jehova.” (Idiligyo ti Nu 25:4.) Nupay kasta, binugbugaw ni Rizpa dagiti tumatayab ken dagiti atap nga animal tapno saanda nga asitgan dagiti bangkayda, ket idi agangay, imbilin ni David a maummong dagiti tulangda sana impaitabon a kadua dagiti tulang da Saul ken Jonatan iti lugar a pagitabonan ni Kis.—2Sm 21:1-14.
2. Anak ni Jonatan; apoko ni Ari Saul. Idi dimteng ti damag manipud Jezrael a natayen da Saul ken Jonatan, ti lima ti tawenna nga ubing a ni Mefiboset ket inawit ti mangtagtagibi kenkuana sada nagtalaw gapu iti buteng. Idin, “natnag ti ubing ket napilay” ti dua a sakana. (2Sm 4:4) Sumagmamano a tawen kalpasanna, nagnaed ni Mefiboset iti balay ni Maquir nga anak ni Amiel idiay Lo-debar. Naammuan daytoy ni David manipud ken Ziba, sigud nga adipen iti balay ni Saul. Awan duadua a gapu ta nalagipna ti tulagna ken Jonatan (1Sm 20:12-17, 42), kayat ni David nga ipakita ti naayat a kinamanangngaasi iti asinoman a “natedda iti balay ni Saul.” Naiyeg ni Mefiboset iti sanguanan ni David, ket idi inlawlawag ti ari a kayatna nga ipakita ti naayat a kinamanangngaasi ken Mefiboset babaen ti panangisublina kenkuana “ti intero a talon ni Saul” ken panangyurnosna a ‘mangan a patinayon ni Mefiboset iti tinapay iti lamisaanna,’ sipapakumbaba a kinuna ni Mefiboset: “Ania ti adipenmo, ta intaliawmo ta rupam iti natay nga aso a kas kaniak?” Nupay kasta, kas panangtungpal iti kayat ni David mapasamak, ni Ziba ken amin dagidiay agnanaed iti balayna (a pakairamanan ti 15 nga annak ken 20 nga adipen) nagbalinda nga ad-adipen ni Mefiboset, a nakaitedan ti sanikua ni Saul. Kalpasan dayta, nagnaed ni Mefiboset idiay Jerusalem ket nangnangan a kanayon iti lamisaan ti ari.—2Sm 9.
Idi nagtalaw ni David manipud Jerusalem gapu iti kumplot ni Absalom, isu sinabet ni Ziba, a nangipaay kenkuana kadagiti abasto. Kas sungbat kadagiti panagimtuod ni David maipapan ti ayan ni Mefiboset, kinuna ni Ziba: “Agnanaed idiay Jerusalem; ta kinunana: ‘Ita nga aldaw isubli kaniak ti balay ti Israel ti naarian a panagturay ni amak.’” Gapu itoy, kinuna ti ari ken Ziba: “Adtoy! Kukuam ti isuamin a kukua ni Mefiboset.” (2Sm 16:1-4) Simmabet ni Mefiboset ken David idi nagsubli ti ari iti Jerusalem, ket ti salaysay kunaenna a “saanna nga inasikaso dagiti sakana wenno inasikaso ti imingna wenno linabaan dagiti kawesna manipud idi aldaw nga ipapanaw ti ari agingga iti aldaw nga iyaayna a sitatalna.” Idi inimtuod ni David no apay a saan a kimmuyog kenkuana ni Mefiboset, inlawlawag ni Mefiboset nga isu ket inallilaw ti adipenna ken kinunana pay: “Gapuna pinardayana ti adipenmo iti apok nga ari. Ngem ti apok nga ari ket kas iti maysa nga anghel ti pudno a Dios” (kayatna a sawen, makitana no ania ti pudno a napasamak). Nalawag a nabigbig ni David nga awan basol ni Mefiboset, isu a binaliwanna daydi immuna a bilinna babaen ti panangikunana: “Sika ken ni Ziba pagbinglayanyo ti talon.” Idin, insungbat ni Mefiboset: “Bay-am nga uray alaenna amin, ita ta dimtengen a sitatalna ti apok nga ari iti balayna.”—2Sm 19:24-30; idiligyo ti Pr 18:17; 25:8-10.
Idi kiniddaw dagiti Gabaonita ti pannakapapatay dagiti kaputotan ni Saul kas pangabbong iti dakes a gandat ti ari maibusor kadakuada, naasian ni David ken Mefiboset gapu iti sapata ken Jehova iti nagbaetan da David ken Jonatan isu a saan a napapatay ni Mefiboset. (2Sm 21:7, 8) Awanen ti ipaay ti Kasuratan a kanayonan nga impormasion maipapan ken Mefiboset, nupay nagtultuloy pay a nagbiag ti pamilia ni Saul agingga iti naud-udi a kaputotan babaen iti anak ni Mefiboset a ni Mica (Mikias). (2Sm 9:12; 1Cr 9:39-44) Nalawag a naaddaan met ni Mefiboset iti nagan a Merib-baal, kas ipakita ti 1 Cronicas 8:34 ken 9:40.