ZIBA

Ti adipen ti sangakabbalayan ni Saul. Naammuan kenkuana ni David ti maipapan iti pilay nga anak ni Jonatan a ni Mefiboset. Imbilin ni David a maipan ni Mefiboset idiay Jerusalem ket dinutokanna ni Ziba, ti 15 nga annakna, ken ti 20 nga adipenna a mangaywan iti tawid ni Mefiboset. (2Sm 9:2-12 [Ti pannakadakamat ti “lamisaanko” iti 2Sm 9 bersikulo 11 ket kaaduan a maikunkuna a biddut ti eskriba maipaay iti sasao a “lamisaan ni David”; posible met nga ul-uliten laeng idi ni Ziba ti mismo a sasao ni David.]) Idi nagtalaw ni David manipud Jerusalem maigapu iti panagrebelde ni Absalom, nangyeg kenkuana ni Ziba iti kasapulan unay nga abasto a taraon ken an-animal. Nupay kayat ni Mefiboset ti kumuyog, imbati isuna ni Ziba ket imbagana ken David nga inranta ni Mefiboset ti agbati idiay Jerusalem, a namnamaenna a mabawina ti pagarian agpaay iti balay ni Saul. Saanen a kinompirma ni David dayta a banag ket dagus nga inkeddengna a maited ken Ziba ti sanikua ni Mefiboset.​—2Sm 16:1-4.

Idi nagsubli ni David kalpasan a naparmek ti panagrebelde, maysa ni Ziba kadagidiay immuna a nangkablaaw iti ari. Kalpasanna, simmabet ni Mefiboset ken David, kimmablaaw sa impakaammona ti panangallilaw ken pammardaya ni Ziba. Gapu itoy, inkeddeng ni David a rumbeng a pagbingayan da Mefiboset ken Ziba ti sanikua. Nupay kasta, kinuna ni Mefiboset: “Bay-am nga uray alaenna [ni Ziba] amin, ita ta dimtengen a sitatalna ti apok nga ari iti balayna.”​—2Sm 19:17, 24-30.