MIKAIAS
[Siasino ti Kas ken Jehova?].
1. Asawa ni Ari Rehoboam, anak ni Uriel ti Gabaa, ken ina ni Ari Abias ti Juda. Maawagan met iti “Maaca.”—2Cr 11:18, 20; 13:1, 2.
2. Anak ni Imla ken maysa a mammadto ni Jehova iti makin-amianan a pagarian ti Israel bayat ti panagturay ni Ari Acab. (1Ar 22:8) Idi a ni Ari Jehosafat ti Juda simmarungkar ken Acab, isu inawis ti Israelita nga ari a makikadua iti maysa a namilitariaan a kampania maibusor kadagiti Sirio tapno matagikuada manen ti Ramot-galaad. Inawat dayta ni Jehosafat, ngem kiniddawna nga ammuenda pay ti sao ni Jehova. Gapuna nangummong ni Acab iti 400 a mammadto ket inimtuodna kadakuada: “Mapanakto kadi a bumusor iti Ramot-galaad iti gubat, wenno idiakto kadi?” Kas sungbat, imbagada kenkuana a mapan, ta ni Jehova itedna ti siudad iti ima ti ari. Nupay kasta, kinalikaguman ni Jehosafat ti kanayonan a pammasiguro, nga iti dayta agar-arimadeng ni Acab a nangpaayab ken Mikaias, ti mammadto a kanayon a nagipadto iti dakes maipaay kenkuana. Ti naibaon a mensahero indagadagna ken Mikaias a ti sasao nga isawangna ken Acab ket kas iti sasao ti maysa kadagiti dadduma a mammadto. Idi damo, kasta ti inaramid ni Mikaias, ngem pinagsapata ni Acab a sawenna ti “kinapudno iti nagan ni Jehova.” Iti dayta, kinuna ni Mikaias: “Pudno unay a makitak dagiti amin nga Israelita a naiwarawara iti bambantay, kas karkarnero nga awanan iti pastor.”—1Ar 22:1-17; 2Cr 18:1-16.
Kalpasanna, insalaysay ni Mikaias ti sirmatana a ni Jehova situtugaw iti nailangitan a tronona ken agim-imtuod kadagiti nagtataripnong nga espiritu a parsua: “Siasinonto ti mangsikap ken Acab, tapno sumang-at koma ket mapasag idiay Ramot-galaad?” Maysa kadagiti espiritu ti nagboluntario a mapan ken agbalin a “makaallilaw nga espiritu” iti ngiwat dagiti amin a mammadto ni Acab. Insungbat ni Jehova: “Isu sikapamto, ken, kanayonanna, sikanto ti rummuar a nangabak. Rummuarka ket aramidem ti kasta.” Idin ni Mikaias imbagana ken Acab a ti Dios nangikabil iti makaallilaw nga espiritu iti ngiwat dagiti amin a mammadtona, “ngem ni met laeng Jehova nangisao iti didigra maipapan kenka.” Gapu iti dayta, ti ulbod a mammadto a ni Zedekias kinabilna ni Mikaias iti pingping ket mangrabrabak nga insaludsodna: “Iti ania koma a dalan a limmasat manipud kaniak ti espiritu ni Jehova tapno makisao kenka?” Situtured nga insungbat ni Mikaias: “Adtoy! Makitam no ania a dalan iti dayta nga aldaw inton sumrekka iti kaunggan a siled tapno aglemmengka.” Idin imbilin ni Acab a maikabil ni Mikaias iti balay a pagikulongan, a sadiay mataraonan ti mammadto kadagiti napabassit a sustento a tinapay ken danum agingga nga agsubli ti ari a sitatalna. Nupay kasta, pulos a di nagsubli ni Acab, agsipud ta bayat ti bakal idiay Ramot-galaad, “adda idi maysa a lalaki a nangballok iti bai a nangipaspasarak,” ket ti ari ti Israel ti napuntaan ti pana, iti kasta nagin-inut a natay. Ti maudi a sasao ni Mikaias ken Acab ket: “No ngarud agsublika a sitatalna, ni Jehova saan a nagsao babaen kaniak.” Ti ipapatay ti ari pinaneknekanna a ni Mikaias pudno a mammadto ni Jehova.—1Ar 22:18-37; 2Cr 18:17-34.
3. Maysa kadagiti prinsipe nga imbaon ni Ari Jehosafat iti intero a Juda kas mannursuro, a kaduana dagiti Levita ken papadi. Adda idi kadakuada “ti libro ti linteg ni Jehova” bayat a nangisursuroda kadagiti umili iti amin a siudad ti Juda.—2Cr 17:7-9.
4. Ama ni Acbor (Abdon) a, kaduana ti dadduma, imbaon ni Ari Josias tapno agimtuod ken Jehova maipapan iti sasao a nailanad iti kabbaro a nasarakan a libro ti Linteg. Maawagan met iti Mikias.—2Ar 22:12, 13; 2Cr 34:20, 21.
5. “Anak ni Gemarias nga anak ni Safan.” Adda idi iti siled a panganan ni Gemarias nga amana idi imbasa sadiay ni Baruc kadagiti umili ti lukot a naglaon iti sasao ni Jehova babaen ken Jeremias maibusor iti Israel, Juda, ken amin a nasnasion. Kalpasan a nangngegna daytoy a mensahe, impadamag ni Mikaias iti sekretario ken piprinsipe ni Ari Jehoiaquim no ania ti nangngeganna.—Jer 36:2, 9-13.
6. Inapo ti padi a ni Zacarias, a daytoy a Zacarias ket karaman kadagidiay addaan kadagiti trumpeta iti seremonia ti inagurasion ti naibangon manen a pader ti Jerusalem. Maawagan met iti Mica.—Ne 11:22; 12:31, 35.
7. Padi a karaman kadagidiay addaan kadagiti trumpeta a nagtokar iti maysa kadagiti dua a “koro ti panagyaman” a nakipaset iti martsa ti inagurasion maipaay iti naibangon manen a pader ti Jerusalem idi kaaldawan ni Nehemias.—Ne 12:40, 41.