MIGRON

[Pagirikan].

Maysa a lugar “iti wayaway [wenno, kaadaywan a paset] ti Gabaa” a nagpakarsuan ni Ari Saul idi pinapatay ni Jonatan ken ti agaw-awit iti armasna ti agarup 20 a lallaki manipud iti kampo dagiti Filisteo iti asideg ti Micmas. (1Sm 13:16, 23; 14:1, 2, 13-16) Maikunkuna a ti Tell Miryam, agarup 1 km (0.6 mi) iti laud nga abagatan-a-laud ti Mukhmas (Micmas), ket isu ti Migron.

Iti Isaias 10:28, naipadto a maysa ti Migron kadagiti siudad a lumasatan dagiti Asirio iti panagturongda iti Jerusalem. Yantangay nadakamat kalpasan ti Ai (Aiat) ken sakbay ti Micmas, agparang nga adda ti Migron iti amianan, saan nga iti abagatan, ti Micmas. No kasta, naisingasing nga adda maikadua a Migron (Makrun iti amianan a laud ti Micmas). Nupay kasta, no adda pay laeng ita ti Migron idi kaaldawan ni Saul, kasla imposible nga adda pay sabali nga ili a kasta met laeng ti naganna a nakurang a 3 km (2 mi) laeng ti kaadayona. Isu a ti padto mabalin a dakdakamatenna laeng dagiti siudad a maapektaran ti iraraut ti Asiria, ket saan a maipapan dayta iti panagsasaganad dagiti siudad wenno sadino ti ayanda. (Isa 10:24, 28-32) Gapuna ti Migron iti Isaias 10:28 mabalin nga isu met laeng ti nadakamat iti 1 Samuel 14:2.