MINNI

Maysa a kadaanan a pagarian nga inawagan ti Dios tapno makirupak iti Babilonia. Iti dayta a tiempo, kaaliansa ti Minni ti pagpagarian ti Ararat ken Askenaz, nga aminda ket iturturayan ni Ciro.​—Jer 51:27-29.

Saan a masigurado ti eksakto nga ayan daytoy kadaanan a pagarian ken dagiti umilina. Ti sumagmamano nga agar-aramid iti mapa inkabilda dayta iti rehion a nagbaetan ti Danaw Van ken Karayan Araxes. Ngem kaaduan a komentarista paboranda ti kapanunotan nga adda dayta iti abagatan a daya ti Danaw Van.

No dagiti Mannai wenno Manneano ti nagnaed idi iti Minni, kas kunaen ti sumagmamano nga eskolar, naparmek ngarud ti Minni iti sumagmamano a gundaway kas kunaen dagiti cuneiform a kitikit, idi damo babaen kadagiti Asirio ket kalpasanna babaen iti Imperio ti Media. Sigun iti maysa a cronica ti Babilonia, iti maikasangapulo a tawen ti panagturay ni Nabopolassar (636 K.K.P.) “kinautibona dagiti Manneano a bimmadang kadakuada (awan sabali, dagiti Asirio).” (Assyrian and Babylonian Chronicles, ni A. K. Grayson, 1975, p. 91) Ngem idi tiempo a pannakaparmek ti Babilonia idi 539 K.K.P., ti Minni ket iturturayanen ti Imperio ti Medo-Persia.