ASKENAZ

1. Ti umuna a nainaganan kadagiti tallo nga annak ni Gomer, ti anak ni Jafet.​—Ge 10:3; 1Cr 1:6.

Iti Judio a sursurat idi edad media (ken uray kalpasan dayta) nayaplikar ti termino nga “Askenaz” iti puli a Teutoniko, ken nangnangruna iti Alemania. Gapuna uray ita, dagiti Judio manipud kadagiti Germanic a pagilian matuktukoyda kas Askenazim idinto ta dagiti Judio manipud Espania ken Portugal maawaganda iti Sefardim.

2. Dakamaten ti Jeremias 51:27 ti pagarian ti Askenaz kas makial-aliansa iti pagpagarian ti Ararat ken Minni maibusor iti Babilonia idi tiempo ti pannakarba daytoy (539 K.K.P.). Yantangay maipagpagarup a masarakan ti Ararat iti rehion ti Danaw Van, ken naibilang ti Minni (natukoy kas “Mannai” kadagiti Asirio a kitikit) kas adda iti abagatan a daya ti Danaw Van, mabalbalin nga adda ti pagarian ti Askenaz iti asideg dagitoy a rehion, nalabit iti makin-amianan a deppaar, iti nagtengngaan ti Nangisit a Baybay ken Baybay Caspiano.

Imbilang dagiti arkeologo a ti nagan nga Askenaz ket katupag ti Asirio nga Ashguzai, a nabatad a nagaplikar kadagiti nagkauna nga Escita iti aglawlaw ti Nangisit a Baybay ken Baybay Caspiano. Iti cuneiform a taptapi, nailanad ti maysa nga aliansa iti nagbaetan daytoy a tribu ken ti Mannai (Minni) iti maysa nga iyaalsa maibusor iti Asiria idi maikapito a siglo K.K.P.