GOMER
1. Apoko ni Noe ken kaunaan a nainaganan nga anak ni Jafet, nayanak kalpasan ti Layus. (Ge 10:1, 2; 1Cr 1:4, 5) Isu ken ti annakna a da Askenaz, Rifat, ken Togarma ket nailista a karaman iti “pampamilia ti annak ni Noe sigun kadagiti kapuonan ti pamiliada” a nagtaudan dagiti nagwaras a nasion kalpasan ti Layus.—Ge 10:3, 32.
Ti nasion a nagtaud ken Gomer ket nainaig kadagiti nagkauna a Cimmeriano sigun iti pakasaritaan, maysa a puli nga Aryano a nabatad a nagnaed iti rehion iti amianan ti Nangisit a Baybay. Idi maikawalo a siglo K.K.P., bayat ti panagturay ti Asirio a ni Ari Sargon, nalawag a pinagtalaw ida dagiti Escita ket nagturongda iti ballasiw ti Caucasus (ti kabambantayan a rehion iti nagbaetan ti Nangisit a Baybay ken Baybay Caspiano). Nagsaknap dagiti Cimmeriano iti Asia Menor, a rinautda ti pagarian ti Urartu (Ararat) ken sinerrekda ti makindaya nga Asia Menor, nga awan duadua a mayanninaw ti irarautda sadiay babaen ti Armeniano a nagan ti Capadocia a Gamirkʽ. Gapu ta naipasangoda iti nabileg nga Imperio ti Asiria iti daya, nagpalaud dagiti Cimmeriano ket nakigubatda kadagiti Frigiano ken Lidiano. Idi agangay, napagtalawda manipud Lidia iti bileg ti Lidiano nga ari a ni Alyattes (sinunuan ni Croesus).
Ti “Gomer ken amin dagiti bunggoyna” ket inlanad ti padto ni Ezequiel (a nabatad a nalpas a naisurat dayta idi agarup 591 K.K.P.) a karaman kadagiti puersa ni Gog a kadua ti Togarma “iti kaadaywan a paspaset ti amianan, ken amin dagiti bunggoyna.” Dayta a padto ket maipapan iti idadarup ni “Gog iti daga ti Magog” maibusor iti naurnong manen nga ili ni Jehova. —Eze 38:2-8; kitaenyo ti GOG Num. 2; MAGOG Num. 2; TOGARMA.
2. Ti babai nga anak ni Diblaim a nagbalin nga asawa ni Oseas sigun iti pammilin ni Jehova iti dayta a mammadto. (Os 1:2, 3) Idi agangay, nangipasngay ni Gomer iti tallo nga annak, a dagiti naidumduma a naganda ket inusar ti Dios tapno ipadtona dagiti makadidigra a resulta ti naespirituan a pannakikamalala ti Israel babaen iti idolatria. Iti panangisalaysayna iti pannakaipasngay ti umuna nga anak, maysa a lalaki a napanaganan iti Jezrael, kunaen ti salaysay a ni Gomer “nangipasngay kenkuana [Oseas] iti anak a lalaki.” Nupay kasta, mainaig iti pannakaipasngay ti simmaganad a dua nga annak, saan a natukoy a ti mammadto ti amada, ket daytoy ti nakaibatayan ti panangikuna a nalabit bastardo dagita nga annak. (Os 1:3-9) Kasla desdeskribiren ti Oseas 3:1-3 ti pannakaisubli ni Gomer iti mammadto manipud pannakikamkamalalana, a nagatang a kasla maysa nga adipen, a dayta ti mangyilustrar iti panangawat manen ti Dios iti nasion ti Israel gapu ta nagbabawida.