MISREFOT-MAIM

[Dagiti Panagpuor iti Kadandanuman].

Lugar a nangkamatan dagiti Israelita kadagiti buyot ti ar-ari ti Canaan nga adda iti amianan a kaaliansa ni Jabin kalpasan ti panangparmek kadakuada ti Israel iti dandanum ti Merom. (Jos 11:1-5, 8) Idi nabingbingayen a naipatawid ti Naikari a Daga, ti disso manipud Libano agingga iti Misrefot-maim ket saan pay laeng a naparmek. (Jos 13:2, 6) Nupay saanda a sigurado, kuna ti dadduma a ti Misrefot-maim ket isu dagiti rebrebba a masarakan idiay Khirbet el-Musheirefeh (Horvat Mashref), agarup 20 km (12 mi) iti amianan nga amianan-a-daya ti Acco (ʽAkko). Daytoy a lugar ti pagnaan dagiti umili ti Misrefot-maim nga agturong kadagiti siudad nga adda iti Tanap ti Acco ken iti Labneng Hula. Nalabit napanaganan dayta iti Misrefot-maim (kaipapananna “Dagiti Panagpuor iti Kadandanuman”) gapu kadagiti nabara nga ubbog a masarakan iti agarup 180 m (590 pie) manipud iti dayta a disso.