MORESET, MORESET-GAT

[Sanikua ti Gat].

Nalawag a dayta ti pagtaengan ni mammadto Mikias. (Jer 26:18; Mik 1:1) Mabalin nga isu dayta ti Tell el-Judeideh (Tel Goded), agarup 35 km (22 mi) iti abagatan a laud ti Jerusalem ken agarup 10 km (6 mi) iti abagatan a daya ti Gat. Ipasimudaag ti nagsilpo a nagan a Moreset-gat (Mik 1:14) a ti siudad ket nainaig iti Gat. Nalabit adda dagiti tiempo nga inturayan dayta ti Gat a siudad dagiti Filisteo, yantangay adda pay sabsabali a lugar nga inturayan dagiti Filisteo malaksid ti lima a kangrunaan a siudadda (maysa kadagita ti Gat).​—1Sm 6:18; 27:5.

Tarusan dagiti dadduma a ti nagan a Moreset (kaipapananna ti “Sanikua”) iti Mikias 1:14 ket naaramat a saan laeng a maymaysa ti kayuloganna. Ti Hebreo a termino maipaay iti sasao a “sagut iti panagsina [wenno, pammakada a sagut]” iti daytoy a teksto ipasimudaagna ti maysa a tao wenno sanikua a temporario wenno permanente a naited. Maitunos iti dayta, ti Sion (Mik 1:13) mapukawna daytoy a siudad, ket ti Moreset agserbi a kas “sagut iti panagsina.”