GITITA

[Iti (Kukua ti) Gat].

Termino a masansan a nayawag iti maysa nga agnanaed wenno umili iti Gat a siudad dagiti Filisteo. (Jos 13:2, 3) Ti higante a ni Goliat ket maysa a Gitita. (2Sm 21:19; 1Cr 20:5) Dagiti Gitita, agraman ni Ittai (naawagan ‘ganggannaet’ ken ‘destiero’ iti pagtaenganna), simamatalek a nakikaduada ken David bayat ti panagtalawna idi tiempo ti panagrebelde ni Absalom.​—2Sm 15:13, 18-22; 18:2; kitaenyo ti GAT; ITTAI Num. 1.

Nupay kasta, ti termino a “Gitita” nayawag met ken Obed-edom, a ti pagtaenganna ti temporario a nagyanan ti lakasa ti tulag. (2Sm 6:10, 11; 1Cr 13:13) Adda dagiti eskolar a mamati nga isu agnanaed met idiay Gat a siudad dagiti Filisteo. Nupay kasta, agparang a mabalbalin a ni Obed-edom ket maysa a Levita ken mabalin a naawagan Gitita agsipud ta nagtaud iti Gat-rimmon a siudad dagiti Levita.​—Jos 21:20, 23, 24; kitaenyo ti OBED-EDOM Num. 1.