ITTAI

[napaababa a porma ti Itiel].

1. Maysa a Gitita a mannakigubat a nakasungsungdo ken David; maipagarup a manipud iti Filisteo a siudad ti Gat. Idi agtaltalaw ni David ken dagiti katulonganna manipud iti Jerusalem gapu iti panagrebelde ni Absalom, kimmuyog ti 600 a Gitita, a pakairamanan ni Ittai. Pinadas ni David nga upayen ni Ittai a mangpanaw iti siudad, ngem ti mannakigubat inyebkasna ti napalalo a debosionna babaen itoy a sasao: “Kas sibibiag ni Jehova ken kas sibibiag ti apok nga ari, iti disso nga ayanto ti apok nga ari, uray no agpaay ken patay wenno agpaay iti biag, sadiay ti ayanto ti adipenmo!” Ngarud, ni David pinalubosanna ni Ittai nga agtultuloy a kumuyog kenkuana.​—2Sm 15:18-22.

Kalpasan ti panangbilangna iti buyotna, dinutokan ni David ti di Israelita a ni Ittai, agraman da Joab ken Abisai, kas papanguluen ti tunggal maysa kadagiti tallo a benneg ti buyotna.​—2Sm 18:2, 5, 12.

2. Maysa kadagiti nabileg a lallaki ni David; maysa a Benjamita ken anak ni Ribai ti Gabaa. (2Sm 23:29) Naawagan iti Itai iti 1 Cronicas 11:31.