Tuladenyo ti Kinasungdo ni Ittai

“NAINDAKLAN ken nakaskasdaaw dagiti aramidmo, Jehova a Dios, ti Mannakabalin-amin. Nalinteg ken napudno dagiti dalanmo, Ari ti kinaagnanayon. Siasinonto a pudno ti saan nga agbuteng kenka, Jehova, ken mangpadayag iti naganmo, agsipud ta siksika ti nasungdo?” Daytoy a kanta, a kinanta idiay langit “dagidiay rummuar a sibaballigi iti atap nga animal ken iti ladawanna,” iturongna ti atensiontayo iti kinasungdo ti Dios. (Apoc. 15:2-4) Tarigagayan ni Jehova a dagiti agdaydayaw kenkuana tuladenda daytoy makaay-ayo a galad.​—Efe. 4:24.

Iti sabali a bangir, ar-aramiden ni Satanas ti amin a kabaelanna tapno dagiti adipen ti Dios ditoy daga maisinada iti ayat ti Dios a pagdaydayawanda. Kaskasdi, adu ti nagtultuloy a nasungdo iti Dios uray iti sidong dagiti nakarigrigat a kasasaad. Anian a yamantayo ta ipatpateg unay ni Jehova ti kasta a debosion! Kinapudnona, naipanamnama kadatayo: “Ni Jehova ket managayat iti kinahustisia, ket saannanto a panawan dagidiay nasungdona.” (Sal. 37:28) Tapno matulongannatayo nga agtalinaed a nasungdo, inramanna iti saona dagiti salaysay maipapan iti ar-aramid ti adu a nasungdo kenkuana. Maysa kadagita ti maipapan ken Ittai a Gitita.

‘Ganggannaet ken Destiero’

Maipagarup a ni Ittai ket maysa nga umili ti Gat, nga agdindinamag a siudad dagiti Filisteo ken nagtaudan ti higante a ni Goliat ken dagiti dadduma a nakabutbuteng a kabusor ti Israel. Damo a nadakamat iti Biblia ni Ittai kas maingel a mannakigubat idi panawen ti iyaalsa ni Absalom ken Ari David. Ni Ittai ken dagiti kakaduana nga 600 a lallaki a Filisteo ket agnanaedda idi kas destiero iti aglawlaw ti Jerusalem.

Ti kasasaad ni Ittai ken dagiti pasurotna mabalin nga impalagipna ken David ti pannakaidestierona a kadua ti 600 a mannakigubat nga Israelita idi immakarda iti teritoria dagiti Filisteo ket simrekda iti lugar ni Aquis, ti ari ti siudad ti Gat. (1 Sam. 27:2, 3) Ania ngata ti inaramid ni Ittai ken dagiti pasurotna idi nagrebelde ken David ti anakna a ni Absalom? Dimmasigda kadi ken Absalom, nagtalinaedda a neutral, wenno nakikaduada iti grupo ni David?

Iladawam iti panunotmo ni David bayat a tumaltalaw manipud Jerusalem, sa simmardeng iti Bet-merac, a kaipapananna “Ti Adayo a Balay.” Mabalin a dayta ti maudi a balay iti Jerusalem iti dalan nga agturong iti Bantay dagiti Olibo sakbay a bumallasiw iti Ginget ti Kidron. (2 Sam. 15:17) Iti dayta a lugar a sinukimat a naimbag ni David ti buyotna bayat ti panagmartsada. Kitaem! Saan laeng a dagiti nasungdo nga Israelita ti kaduana no di ket dagiti pay Kereteo ken amin a Peleteo. Kasta met, karaman pay ti amin a Gitita​—ni Ittai ken dagiti 600 a mannakigubat a kakaduana.​—2 Sam. 15:18.

Buyogen ti pannakipagrikna, kinuna ni David ken Ittai: “Apay koma a makikuyogka met kadakami? Agsublika ket makipagnaedka iti ari [a nabatad a ni Absalom ti tuktukoyenna]; ta ganggannaetka ken, malaksid iti dayta, destieroka manipud lugarmo. Idi kalman a dimtengka ket ita nga aldaw pagallaallaenkanto kadi a maikuyog kadakami, a mapan no mapanak iti sadinoman a papanak? Agsublika ket ikuyogmo nga agsubli ti kakabsatmo, ket watwaten koma ni Jehova maipaay kenka ti naayat a kinamanangngaasi ken kinamapagpiaran!”​—2 Sam. 15:19, 20.

Inyebkas ni Ittai ti di maisin a kinasungdona. Kinunana: “Kas sibibiag ni Jehova ken kas sibibiag ti apok nga ari, iti disso nga ayanto ti apok nga ari, uray no agpaay ken patay wenno agpaay iti biag, sadiay ti ayanto ti adipenmo!” (2 Sam. 15:21) Mabalin a dayta ti nangipalagip ken David iti umasping a sasao ni Ruth nga apongna iti tumeng. (Ruth 1:16, 17) Nagutugot ni David iti kinuna ni Ittai, ket kinunana kenkuana: “Inka ket bumallasiwka” iti Ginget ti Kidron. Gapuna, “bimmallasiw ni Ittai a Gitita ken kasta met dagiti amin a tattaona ken amin dagiti ubbing a naikuyog kenkuana.”​—2 Sam. 15:22.

“Pakasursuruantayo”

“Ti amin a bambanag a naisurat a nasaksakbay naisuratda a pakasursuruantayo,” kuna ti Roma 15:4. Nasayaat ngarud nga iyimtuodtayo, Ania dagiti maadaltayo iti ulidan ni Ittai? Usigem no ania ti mabalin a nangtignay kenkuana nga agbalin a nasungdo ken David. Nupay ganggannaet ken destiero manipud Filistia, binigbig ni Ittai ni Jehova kas sibibiag a Dios ken ni David kas pinulotan ni Jehova. Saanna nga imbilang ni David kas kabusor gapu laeng ta agbinbinnusor dagiti Israelita ken dagiti Filisteo. Para kenkuana, ni David ket saan laeng a manangpapatay iti kampeon dagiti Filisteo a ni Goliat ken iti adu pay a kailian ni Ittai. (1 Sam. 18:6, 7) Imbes ketdi, nabigbigna a ni David ket maysa a tao a managayat ken Jehova ken di pagduaduaan a nailasinna dagiti agkakaimbag a galad ni David. Gapuna, naaddaan met ni David iti dakkel a panagraem ken Ittai. Intalek pay ketdi ni David ti kakatlo iti buyotna iti “sidong ti ima ni Ittai” iti pannakigubatda kadagiti buyot ni Absalom!​—2 Sam. 18:2.

Rumbeng nga iwaksitayo met ti aniaman a panangidumduma wenno ibubusor gapu iti kultura, nasionalidad, wenno puli ket sapulentayo dagiti naimbag a galad ti sabsabali. Ti kinasinged da David ken Ittai ipakitana a no maam-ammo ken ayatentayo ni Jehova, makatulong dayta tapno maiwaksitayo ti panangidumduma.

Bayat nga ut-utobentayo ti ulidan ni Ittai, saludsodantayo ti bagbagitayo: ‘Kasta met kadi ti kinasungdok ken Jesu-Kristo a Dakdakkel a David? Ipakpakitak kadi ti kinasungdok babaen ti naregta a pannakipasetko iti trabaho a panangasaba ken panagaramid iti adalan?’ (Mat. 24:14; 28:19, 20) ‘Pagpatinggaan ti kinatulokko nga agibtur tapno mapaneknekak ti kinasungdok?’

Makagunggona met kadagiti ulo ti pamilia no mennamennaenda ti mapagulidanan a kinasungdo ni Ittai. Nakaapektar kadagiti pasurot ni Ittai ti kinasungdona ken David ken ti pangngeddengna a sumurot iti ari a pinulotan ti Dios. Kasta met, dagiti desision nga aramiden dagiti ulo ti pamilia tapno masuportaran ti pudno a panagdayaw ket mangapektar kadagiti pamiliada ken mabalin pay ketdi a mangyeg iti temporario a pakarigatan. Nupay kasta, naipanamnama kadatayo: “Iti daydiay nasungdo agtignay [ni Jehova] a nasungdo.”​—Sal. 18:25.

Kalpasan ti pannakigubat ni David ken Absalom, awanen ti ibaga ti Kasuratan maipapan ken Ittai. Nupay kasta, ti ababa a salaysay iti Sao ti Dios maipapan ken Ittai ipaayannatayo iti napateg a pannakaawat iti kinasiasinona bayat ti narikut a tiempo ti biag ni David. Ti pannakairaman ni Ittai iti naipaltiing a salaysay paneknekanna a bigbigen ken gunggonaan ni Jehova ti kasta a kinasungdo.​—Heb. 6:10.