ARRAYAN

[Heb., hadhasʹ].

Ti arrayan (Myrtus communis) mabalin a maklasipikar kas nababa a kayo wenno kas dakkel a kayo ken kadawyan idiay Israel ken Libano, a nasayaat ti panagtubona iti nabato a daga. Dumakkel agingga iti katayag a 9 m (30 pie) ngem gagangay a masarakan kas nababa a kayo nga agtayag laeng iti 2 agingga iti 3 m (7 agingga iti 10 pie). Patinayon a berde ti bulongna, nasamek unay ti sangsangana ket napuskol, nasileng, ngumisit a berde ti bulbulongna; agsabong iti riniprip-ong a nabanglo a puraw a sabsabong a no agmataengan agbalin nga umasul a nangisit a bungbunga. Gistay ti intero a mula addaan iti nabanglo a nasagangasang a lana a maus-usar kadagiti bangbanglo. Makan dagiti bunga, nupay nasayamusom ti angotda. Ti arrayan masarakan ita nangnangruna iti Makinngato a Galilea ken iti ginget ti Jordan, ngem agtubo met idiay Jerusalem, kas nabatad a panagtubona idi tiempo ti sirmata ni Zacarias a nailanad iti Zacarias 1:8-11, 16.

Dagiti nabanglo a sanga ti arrayan agraman dagiti sanga ti dadduma a kayo maus-usar idi a pangabbong kadagiti temporario a kalapaw wenno abong-abong iti ruar nga inusar dagiti Hebreo bayat ti Piesta dagiti Abong-abong. (Ne 8:14, 15) Kadagiti padto ti pannakaisubli, ti kayo nga arrayan buyogen ti banglo ken pintasna naipadto nga agtubo a maisukat iti makasalugsog a kasumba ken tumpuar uray pay iti let-ang.​—Isa 41:19; 55:13.

Ti Hebreo a nagan ni Ester, asawa ti Persiano nga Ari Asuero, ket Hadassa, a kaipapananna ti “Arrayan.”​—Est 2:7.