NAAMAN
[nagtaud iti sao a kaipapananna ti “agbalin a makaay-ayo”].
1. Maysa nga apoko ni Benjamin babaen iti inauna nga anakna a ni Bela. (1Cr 8:1-4, 7) Yantangay nagtaud ken Naaman ti maysa a pamilia, dagiti Naamita iti tribu ni Benjamin (Nu 26:40), isu nailista iti dadduma pay a teksto kas maysa kadagiti “annak” ni Benjamin.—Ge 46:21.
2. Maysa a panguluen ti buyot ti Siria idi maikasangapulo a siglo K.K.P., bayat dagiti panagturay ni Jehoram ti Israel ken ni Ben-hadad II ti Siria. Babaen ken Naaman, ‘maysa a naindaklan, maingel, nabileg a lalaki a maipatpateg,’ insalakan ni Jehova ti Siria (2Ar 5:1) Saan a dakamaten ti Biblia dagiti detalye no kasano wenno apay a ni Naaman ti naaramat a mangyeg iti daytoy a pannakaisalakan ti Siria. Ti maysa a posibilidad isu ti panangidaulo ni Naaman iti puersa militar ti Siria a sibaballigi a nangsaranget iti iraraut ni Ari Salmaneser III ti Asiria tapno sakupenna ti Siria. Yantangay ti Siria, a nagtalinaed a siwayawaya, ket nagbalin a neutral nga estado nga adda iti nagbaetan ti Israel ken Asiria, mabalin a napabannayatna ti agresibo nga iraraut Asiria iti laud agingga iti inkeddeng ni Jehova a tiempo a pannakaidestiero ti makin-amianan a pagarian.
Naagasan ti Kukutelna. Agkukutel idi ni Naaman, ket nupay saan nga inkalikagum dagiti Sirio ti pannakaiputongna kas kalikaguman ti linteg ni Jehova kadagiti agkukutel iti Israel, talaga a makaparagsak a damag kenkuana ti pannakaammo no kasano a maagasan iti daytoy makarumen a sakit. Nakagteng kenkuana ti kasta a damag babaen ti Israelita nga adipen ti asawana, a dinakamat ti balasitang ti maipapan iti maysa a mammadto idiay Samaria a makaagas iti kukutel. Dagus a nagluas ni Naaman a mapan idiay Samaria nga awitna ti maysa a surat ni Ben-hadad II a mangyam-ammo kenkuana. Nupay kasta, naibaon a mapan ken Eliseo kalpasan ti natamnay a panangawat kenkuana ni Ari Jehoram ti Israel ken napagatapan nga adda dakes a motibona. Saan a simmabet kenkuana ni Eliseo, imbes ketdi naibaon laeng ti katulongan ni Eliseo tapno maibaga ken Naaman a mamimpito nga agdigus idiay Karayan Jordan. Sipupungtot a pimmanaw ni Naaman gapu ta nasair ti riknana ken impapanna a saan a maikabkabilangan agsipud ta naibaon iti nadumaduma a disso. No saan a nakirinnason kenkuana dagiti katulonganna ken no saanda nga impamatmat kenkuana a nainkalintegan dagiti pammilin, agkukutel pay laeng koma a nagsubli ni Naaman iti pagilianna. Kas nagbanaganna, namimpito a nagdigus idiay Jordan ket simimilagro a nadalusan, ti kakaisuna nga agkukutel a napaimbag babaen ken Eliseo.—2Ar 5:1-14; Lu 4:27.
Agbalin a Managdaydayaw ken Jehova. Gapu ta agyamyaman unay daytoy a panguluen ti buyot ti Siria, nagsubli ken Eliseo iti kaadayo a nalabit 50 km (30 mi), ken nangidiaya kenkuana iti naparabur unay a sagut, a sipepetteng met a nagkedkedan ti mammadto. Kalpasanna dimmawat ni Naaman iti daga nga iyawidna manipud Israel, “ti maawit ti sangaparis a mulo,” tapno agparang nga iti rabaw ti daga ti Israel mabalinna ti agdaton kadagiti sakripisio maipaay ken Jehova, nga inkarina a sipud iti dayta a gundaway saanen nga agdayaw iti sabali a dios. Nalabit pampanunoten idi ni Naaman ti panagdatonna ken Jehova iti rabaw ti maysa nga altar a daga.—2Ar 5:15-17; Ex 20:24, 25.
Kiniddaw met ni Naaman a pakawanen koma ni Jehova ti panagruknoyna iti sanguanan ti dios a ni Rimmon, nga inaramidna laeng dayta gapu iti annongenna a panangkuyog iti lakayen ken nakapuyen nga ari, a kasapulanna ti agsammaked ken Naaman. No kasta idi ti kasasaad, saan ngarud a naimpusuan ti panagruknoyna ta annongenna laeng ti panangatibay iti bagi ti ari, saan a maigapu iti mismo a panagdaydayawna. Namati ni Eliseo iti napudno a kiddaw ni Naaman, ket insungbatna, “Mapanka a sitatalna.”—2Ar 5:18, 19.
Kalpasan a pimmanaw ni Naaman, isu kinamakam ti naagum a katulongan ni Eliseo a ni Gehazi, a siuulbod a pinagparangna a nagbaliw ti panunot ni Eliseo ken awatenna met laeng ti sumagmamano a sagut. Siraragsak a nangted ni Naaman iti sagsagut a pirak ken kawkawes. Ginundawayan ni Gehazi ti akemna kas katulongan ni Eliseo ta nagtignay a siaagum ken sisisikap tapno magunggonaan iti naaramidan ti espiritu ni Jehova. Gapuna, dinusa ni Jehova daytoy a katulongan babaen ti panamagkukutelna kenkuana ken iti kaputotanna agingga iti tiempo a di nakedngan.—2Ar 5:20-27.