Ti Sao ti Dios Nabiag
Ti Tao a Natangsit Nagpakumbaba
NI Naaman a natangsit a kumandante militar iti Siria ken dagiti ad-adipenna ditoy addada iti dalanda a mapan idiay Israel a sadiay inanamaen ni Naaman ti maagasan iti kukutel. Nangngeg ni Naaman manipud iti agtutubo nga Israelita nga adipen iti asawana maipapan kadagiti nakaskasdaaw a milagro nga inaramid ti mammadto ni Jehova idiay Israel. Awit ni Naaman ti maysa a surat manipud iti ari iti Siria a mangipakaammo kenkuana iti ari ti Israel. Ti surat kalikagumanna a maagasan ni Naaman iti kukutelna. Idi simmangpet idiay Israel, imparang ni Naaman ti surat ken Ari Jehoram, a naan-anay a naupay agsipud ta saanna a maagasan daytoy a lalaki. Kinuna ni Jehoram, ‘Ti ari ti Siria agsapsapul laeng ti pannakisusik kaniak.’ Idi a naammuan ti mammadto ni Jehova a ni Eliseo daytoy, kinalikagumanna a maibaon ni Naaman kenkuana.
Gapuna ni Naaman, a kakuyog dagiti kabayona ken karwahena iti gubat, ti napan iti balay ni Eliseo. Ngem ni Eliseo saan pay a pulos a rimmuar a nangsabet kenkuana. Isut’ basta nangibaon iti mensahero a mangiturong ken Naaman: ‘Tapno maagasanka masapul a mapanka ken agdigoska iti mamimpito a daras idiay Karayan Jordan.’ Ti natangsit a ni Naaman nabainan ket pimmanaw a nakapungtot. ‘Pinampanunotko idi a pudno nga isu rummuarto agingga kaniak,’ kinunana, ‘ket agkararagto ken Jehova ket iyaprosnanto ti imana iti rabaw ti disso nga agkukutel. Diak mabalin aya ti agdigos kadagiti karkarayan iti Siria.’ Ngem maysa kadagiti ad-adipen ni Naaman ti nangpakalma kenkuana babaen iti panagrasonna: ‘Apok, no ti mammadto binilinnaka a mangaramid iti maysa a narigat a banag aramidemto aya. Ita apay a dika basta agdigos kas iti imbilinna, ket maagasanka?’
Immimdeng ni Naaman iti adipenna. Simmalog iti Jordan ket bimmatok kadagiti dandanumna. Ket, simimilagro, kalpasan ti maikapito a daras nagpukaw ti kukutelna! Natignay ni Naaman a buyogen iti panangapresiar ket simmubli a napan ken Eliseo tapno agyaman kenkuana, maysa a biahe a nalabit 30 milias (48 km).
Intukon ni Naaman ken Eliseo dagiti nangingina a sagsagut ket kalpasanna nagkalikagum: ‘Ipalubosmo a maited kaniak ti daga nga awit dagiti dua a mulo.’ Maipaay iti ania a panggep? Tapno sadiay mangidatonakto ken Jehova kadagiti datdaton iti daga ti Israel. Kinapudnona, inkari ni Naaman a manipud idin isu saanton a mangidaton kadagiti datdaton wenno daton a mapuoran iti aniaman a dios malaksid ken Jehova.—2 Ar-ari 5:5-17.
Anian a nagdakkelan a panagbalbaliw ni Naaman! Pudno a maysa a nagsayaatan nga ulidan nga usigentayo. Ngem makasurotayo iti sabali pay a leksion manipud iti daytoy a pasamak, isu nga usigenminto iti masanguanan a ruar daytoy a magasin.