NEBAYOT

Ti inauna kadagiti 12 nga annak ni Ismael ken namunganayan ti maysa kadagiti nalatak a tribu dagiti Arabiano. (Ge 25:13-16; 1Cr 1:29-31) Ti kabsat a babai ni Nebayot a ni Mahalat (wenno mabalin a ni Basemat) ket nagbalin nga asawa ti kasinsinda a ni Esau. (Ge 28:9; 36:2, 3) Dagiti kaputotan ni Nebayot ket saan a nadakamat a nagnaed iti aniaman nga espesipiko a lugar; nalabit nagakar-akarda kas dagiti Bedouin a kadua dagiti arbanda. Idi tiempo ni Isaias, “dagiti arban ti Quedar” (ni Quedar ket kabsat ni Nebayot) ken “dagiti kalakian a karnero ti Nebayot” ket nagkaduada iti maysa a padto a nangipakpakauna no kasano a dagita nga animal ket maanamongan a maidaton iti altar ni Jehova.​—Isa 60:7.

Inkagumaan ti dadduma nga eskolar a paneknekan a dagiti kaputotan ni Nebayot ket isu met laeng dagiti Nabataeano a nagbiag kadagiti naud-udi a tiempo, ngem mapagduaduaan ti pammaneknek a mangpasingked iti dayta.