QUEDAR
[nagtaud iti sao a kaipapananna ti “agsipnget”].
1. Maysa kadagiti 12 nga annak ni Ismael.—Ge 25:13-15; 1Cr 1:29-31.
2. Maysa a tribu dagiti Arabo a nagtaud iti anak ni Ismael a ni Quedar ken naibilang a karaman kadagiti “annak ti Daya.” Quedar met ti nagan ti dagada. (Jer 2:10; 49:28, 29) Agakar-akar ti nagnaedan dagiti Quelita ken agpaspastorda, nga addaanda kadagiti pangen ti karnero, kalding, ken kamelio (Isa 60:7; Jer 49:28, 29), ken nabatad a nagnaedda iti desierto iti nagbaetan ti Siria ken Arabia iti daya ti Palestina iti makin-amianan a laud a paset ti Peninsula ti Arabia. Nupay ti sasao a “dagiti purok a pagnaedan ti Quedar” (Isa 42:11) posible a tumukoy kadagiti temporario a tolda, mabalin nga ipasimudaagna a ti sumagmamano kadakuada ket nagnaed iti maysa a lugar. Nalabit gapu iti kinapategda kadagiti tribu dagiti Arabo, ti nagan ti Quedar ket nayawag idi agangay iti amin a tribu iti desierto. Sigun kadagiti Targum ken iti rabbiniko a literatura, ti Arabia a mismo ket naawagan no dadduma iti Quedar.
Ti Sulamita a babai iti Kanta ni Solomon inyaspingna ti napugot a langana “kadagiti tolda ti Quedar” (Sol 1:5, 6; idiligyo ti Sal 120:5), a nalabit naaramid dagitoy iti dutdot ti nangisit a kalding, kas iti tolda ti adu a Bedouin iti agdama. Dakamaten ti padto ni Ezequiel “dagiti panguluen ti Quedar” agraman dagiti Arabo kas komersiante nga aglaklako ti kalakian a korkordero, kalakian a karkarnero, ken kalakian a kalkalding maipaay iti Tiro a siudad ti komersio.—Eze 27:21.
Bayat ti tiempo ti panangdominar ti Asiria iti Makintengnga a Daya, impakpakauna ni mammadto Isaias ti giddato a panagpukaw ti dayag ti Quedar, a bumassit ti bilang dagiti nabileg a pumapanana. (Isa 21:16, 17) Dagiti Quedarita ket nabatad nga isuda ti Qidri wenno Qadri a natukoy kadagiti rekord ti Asiria maipapan kadagiti kampania ti pannakigubat. Iti maysa a salaysay ti kampania militar ti Asirio nga Ari Asurbanipal, inramanna ida kadagiti Aribi (dagiti Arabo) ken Nebayot (idiligyo ti Isa 60:7) ket impasindayagna dagiti asno, kamkamelio, ken karkarnero nga innalada kadakuada kas samsam.
Idi agangay, ni Nabucodonosor nga ari ti Babilonia dinadaelna ti Quedar. (Jer 49:28, 29) Ti panangparmek daytoy nga ari iti makin-amianan nga Arabia ket dinakamat ti Babilonio a historiador a ni Berossus, nga inadaw ni Josephus.—Against Apion, I, 129, 133 (19).
Ti maysa a malukong a pirak (naikuna nga addan idi maikalima a siglo K.K.P.) a nasarakan iti Tell el-Maskhutah idiay Egipto ket naglaon iti Aramaiko a kitikit a: “Ni Qainu bar [anak ni] Gesem, ari ti Qedar [Quedar].” Ti Gesem a matuktukoy ditoy ket mabalin nga isu ni “Gesem nga Arabiano” a nangbusor iti pannakaibangon manen ti pader ti Jerusalem idi kaaldawan ni Nehemias.—Ne 2:19; 6:1, 2, 6.
Kunaen dagiti rekord ti Asiria a ti santuario ni Ari Hazail ti Quedar ket addaan iti ladladawan dagiti sumaganad nga ulbod a didiosen: Atarsamain (kunaen dagiti Asirio nga isu ni Ishtar Dilbat), Dai, Nahai, Ruldaiu, Atarquruma, ken ni Abirillu. Ti maysa a balitok a bituen a naarkosan iti napateg a batbato ti nagserbi kas simbolo ti diosa a ni Atarsamain. Sigun iti Talmud ti Babilonia (Taʽanit 5b), nagdaydayaw met iti danum dagiti umili ti Quedar.