NIMRIM

[mabalin a, Dagiti Leopardo].

Kadagiti padto a naiturong maibusor iti Moab, agpadpada a tukoyen da Isaias ken Jeremias ti “dandanum ti Nimrim.” (Isa 15:5-9; Jer 48:34, 35) Maigapu iti kinadam-eg ti rehion iti aglikmut, ti sumagmamano kunaenda a ti dandanum ti Nimrim isu ti Wadi Nimrin, a ti dandanumna agayus iti Jordan iti amianan ti Natay a Baybay. (Kitaenyo ti BET-NIMRA.) Nupay kasta, ti panagsasaganad ti pannakainagan dagiti lugar kadagiti padto agparang nga ipasimudaagna ti maysa a lugar iti abagatan ti Moab. Gapuna, ad-adu ti mangikuna a dayta ti Wadi en-Numeirah, nga agayus nga agturong iti makin-abagatan a daya nga ungto ti Natay a Baybay agarup 17 km (11 mi) iti laud nga abagatan-a-laud ti Karak. Sigun kadagiti padto, dagitoy a danum agbalindanto a “langlangalang laeng,” kayatna a sawen, iti piguratibo a kaipapanan, mabalin a gapu iti panaglangalang ti daga wenno nalabit gapu ta dagiti ayusda ket pinuttot dagiti puersa ti kabusor.