NOB

Maysa a siudad a nabatad nga adda iti teritoria ti Benjamin ken asideg iti Jerusalem. Nupay mapagduaduaan ti apag-isu nga ayan ti Nob, ipasimudaag ti Nehemias 11:31, 32 ken Isaias 10:28-32 nga adda dayta iti asideg ti Anatot ken mabalin a dumna iti maysa a turod a sadiay ti Jerusalem ket mabalin a makita. Adda dagiti mangikuna nga isu dayta ita ti maysa a disso iti Ras el Mushraf (Bantay Scopus), agarup 1.5 km (1 mi) iti amianan a daya ti mismo a nagsaadan ti templo idiay Jerusalem, ngem saanda a masigurado dayta. No kasta, mabalin a ti Nob adda iti amianan laeng ti Bantay dagiti Olibo.

Idi nagtalaw ni David manipud ken Saul, napan iti nangato a padi a ni Ahimelec nga adda idiay Nob, ti “siudad ti papadi.” Ni Ahimelec intedna ken David ti sumagmamano a tinapay ti pamarang kas taraon maipaay iti lallakina, kasta met ti kampilan ni Goliat, a nakadulin idi sadiay. Nalabit nayakar idiay Nob ti tabernakulo idi naglak-am ti Silo iti nakaro a panangukom ti Dios. (Idiligyo ti 1Sm 14:3; Sal 78:60; Jer 7:12-14.) Idi agangay, ni Saul inakusaranna ni Ahimelec iti pannakikumplot gapu iti panangtulongna ken David. Maitunos iti bilin ni Saul, ni Doeg nga Edomita pinapatayna ti nangato a padi ken ti 84 a sabsabali pay a papadi. Kalpasanna ginudas ni Doeg dagiti lallaki, babbai, ubbing, ken an-animal iti Nob. Ni laeng Abiatar nga anak ni Ahimelec ti nakatalaw.​—1Sm 21:1-9; 22:6-23.

Ti Nob ket maysa kadagiti lugar a nadakamat mainaig iti iyaabante dagiti Asirio a bumusor iti Jerusalem. (Isa 10:24, 32) Dagiti Benjamita nagtaengda manen iti dayta kalpasan ti isusublida manipud pannakaidestiero idiay Babilonia.​—Ne 11:31, 32.