LASONA

[Heb., ba·tsalʹ].

Nasagangasang ti ramanna a nagtimbukel-bagasna a mula a makapagbiag laeng iti dua a tawen. Addaan dayta iti immarantiddog a kasla tubo a bulbulong. Ti lasona (Allium cepa) ket maysa kadagiti pagtaraon nga inil-iliw ti naglalaok a bunggoy kasta met dagiti Israelita idiay let-ang kalpasan ti pannakawayawayada manipud Egipto. (Nu 11:4, 5) Iti dayta a daga a nakakautibuan ti Israel, nasaknap ti pannakaimula dagiti lasona. Ti Griego a historiador a ni Herodotus (II, 125) dakamatenna pay ti maysa a kitikit a mangibagbaga a dagiti lasona ket karaman kadagiti taraon a naipaay kadagiti trabahador iti maysa a piramida ti Egipto. Idiay Egipto, dagiti lasona, a gagangay a narepreppet, ket naidaton kadagiti didiosen, nupay saan a naipalubos a kanen dayta dagiti papadi. Nadeskribir dagiti lasona ti Egipto kas nalukneng, ket ngarud nalaklaka a marunaw ngem ti dadduma a kita ti lasona, kasta met a sumam-it ti ramanna imbes a naadat, wenno makasugkar.