OFRA
1. [Urbon [Dagiti Kalakian nga Ugsa]]. Maysa a kaputotan ni Juda babaen ken Meonotai.—1Cr 4:1, 14.
[2, 3: mabalin a, Lugar ti Tapok]
2. Maysa a siudad ti Benjamin. (Jos 18:21, 23) Ti posible nga ayanna mabalin a masinunuo manipud iti salaysay maipapan kadagiti pannakiranget ti Israel kadagiti Filisteo bayat ti panagturay ni Saul. Manipud pakarsoda idiay Micmas, dagiti bunggoy dagiti manangkamkam a Filisteo rimmuarda a dumarup iti tallo a nadumaduma a turong. Maysa a bunggoy ti nagturong iti dalan nga agturong idiay Ofra. Ti sabali nagpalaud iti dalan nga agturong idiay Bet-horon, idinto ta ti sabali pay nagdaliasat nga agpadaya iti “dalan nga agturong iti beddeng a tumannawag iti ginget ti Zeboim.” Yantangay adda paset ti buyot dagiti Israelita a nagpakarso idiay Geba iti abagatan ti Micmas, nalawag a nagpaamianan ti bunggoy dagiti Filisteo a nagnada iti dalan nga agturong idiay Ofra. Gapuna, maibatay iti daytoy, ti Ofra adda iti amianan ti Micmas.—1Sm 13:16-18.
Masansan a kunaen dagiti eskolar a ti Ofra isu met laeng ti siudad a maawagan Efraim (2Sm 13:23; Jn 11:54) ken ti Efrain (2Cr 13:19), a naipagarup nga isu met laeng ti et-Taiyiba (a. 6 km [3.6 mi] iti amianan a daya iti daya ti Bethel).
3. Ti taeng ni Gideon, ken sadiay a ti anghel ni Jehova pinarebbenganna ni Gideon nga isalakanna ti Israel manipud dakulap ti Midian. (Uk 6:11-32) Kalpasan ti panagballigina maibusor kadagiti buyot ti kabusor, nangaramid ni Gideon iti maysa nga efod manipud kadagiti naikontribusion a samsam ket impabuyana dayta idiay Ofra. Kalpasanna, daytoy nga efod ket naaramat kas idolo a pagrukbaban. (Uk 8:24-27) Idi agangay, kalpasan ti ipapatay ken pannakaitabon ni Gideon idiay Ofra, ti ambisioso nga anakna a ni Abimelec “pinatayna ti kakabsatna . . . pitopulo a lallaki, iti rabaw ti maysa a bato, ngem natedda ni Jotam nga inaudian.” (Uk 8:32; 9:5) No di karaman ni Abimelec, naaddaan ni Gideon iti 70 nga annak. (Uk 8:30, 31) Ngarud, yantangay nalisian ni Jotam ti pannakagudas, nalawag nga 69 laeng nga annak ti napapatay ni Abimelec idiay Ofra. Ti sasao ni Jotam idi agangay maipapan iti dayta a pasamak agparang nga ipasimudaagna laeng ti panggep ni Abimelec a mangpapatay kadagiti amin a 70 nga annak. (Uk 9:18) Nupay kasta, kas maikanatad a kunaen ti maysa a Judio a komentario: “Umiso latta a sawen a ti gupgop a bilang ti napapatay ket ‘pitopulo.’”—Soncino Books of the Bible, inurnos ni A. Cohen, London, 1950 (Josue ken Uk-ukom, p. 234).
Daytoy nga Ofra mabalbalin nga adda iti laud ti Jordan. Maikunkuna a dayta ti el-ʽAffuleh (ʽAfula), agarup 45 km (28 mi) iti amianan ti Siquem, ngem di masigurado a kasta.