PAHAT-MOAB

[Gobernador ti Moab].

Nagtaudan ti maysa a pamilia iti Israel. No maysa nga opisial iti Moab, kas mabalin nga ipasimudaag ti naganna, nalabit dayta ket kabayatan ti tiempo idi a ti Moab adda iti sidong ti panangituray ti Juda. Nupay kasta, agtalinaed a saan a masigurado no nagtakem iti kasta a saad yantangay awan ti naikuna maipapan kenkuana iti rekord ti Kasuratan.

Dagiti kaputotan ni Pahat-moab a nailanad iti Esdras ken Nehemias ket nagbiag amin kalpasan ti pannakaidestiero. Ti sumagmamano kadakuada ti nangbukel iti maikadua a kaaduan ti kamengna a pamilia a nakipagsubli ken Zorobabel idi 537 K.K.P. (Esd 2:1, 2, 6; Ne 7:11) Idi tiempo ti panagsubli ni Esdras idi 468 K.K.P., nga ad-adu a kaputotan ni Pahat-moab ti kimmuyog kenkuana, ti sumagmamano kadagiti nangbukel iti immuna a grupo (wenno dagiti putotda) nangalada iti ganggannaet nga assawa a babbai, ngem nagtungpalda iti pammagbaga ni Esdras a papanawenda ida. (Esd 8:1, 4; 10:30, 44) Ti sabali pay a kameng daytoy a pamilia, ni Hassub, timmulong ken Nehemias a mangtarimaan iti pader ti Jerusalem, ket ti maysa a kaputotan wenno pannakabagi ti pamiliada karaman met kadagidiay nangpatalged babaen iti selio iti tulagan ti kinamatalek a naidatag di nagbayag kalpasanna.​—Ne 3:11; 9:38; 10:1, 14.