PASUR

1. Ama ti Gedalias a maysa kadagiti prinsipe ti Juda a nangipaipisok ken Jeremias iti pagurnongan ti danum.​—Jer 38:1, 4, 6.

2. Maysa a prinsipe iti pannakabagi a bunggoy nga imbaon ni Ari Zedekias tapno agimtuod ken Jeremias maipapan iti masanguanan ti Jerusalem. (Jer 21:1, 2) Indawat met ni Pasur iti ari a mapapatay ni Jeremias. (Jer 38:1, 4, 6) Kadagitoy dua a teksto, naawagan ni Pasur iti “anak ni Malkias.” Ti pamilia ti papadi a nagsubli manipud pannakaidestiero idiay Babilonia ket addaan iti kasta met laeng a nagan iti listaan ti kapuonanda, “ni Pasur nga anak ni Malkias.” (1Cr 9:12; Ne 11:12) No ni prinsipe Pasur ket pudno a maysa a padi, mabalin nga isu ti nangalaan ti “annak ni Pasur” (Num. 4) iti naganda.

3. Maysa a padi, “anak [wenno kaputotan] ni Immer, . . . ti mangidadaulo a komisionado iti balay ni Jehova.” Sinupiat ni Pasur dagiti padto ni Jeremias ket kinabilna ti mammadto sana inkabil kadagiti tul-ong, ken rinuk-atanna iti simmaruno nga aldaw. Kas nagbanaganna, babaen ken Jeremias, impakpakauna ni Jehova ti pannakaidestiero ken ipapatay ni Pasur idiay Babilonia ket sinukatanna met ti naganna manipud Pasur a nagbalin nga “Aliaw iti intero nga aglikmut” (Heb., Ma·ghohrʹ mis·sa·vivʹ) (Jer 20:1-6), sasao nga adu a daras nga agparang iti libro a Jeremias.​—Jer 6:25; 20:3, 10; 46:5; 49:29.

4. “Ti annak ni Pasur” ket maysa a sangakabbalayan ti papadi iti dasig ti ammada, a ti 1,247 kadakuada ket nagsubli a kadua ni padi Jesua idi 537 K.K.P. manipud pannakaidestiero. (Esd 2:1, 2, 36, 38; Ne 7:41) Innem kadagitoy ti nangasawa iti ganggannaet a babbai ngem pinagtalawda ida kalpasan a simmangpet ni Esdras idi 468 K.K.P.​—Esd 10:22, 44; kitaenyo ti Num. 2.

5. Maysa a padi, wenno inapo, ti maysa a tao a simmuporta iti tulag a saan a mangala iti ganggannaet nga asawa, idi tiempo ni Gobernador Nehemias.​—Ne 9:38; 10:1, 3, 8.