PATARA

Ti sangladan ti Licia. Nalabit idi 56 K.P., ditoy nga immakar iti maysa a barangay ni apostol Pablo ken dagiti katimpuyogna, idi nagturongda idiay Fenicia. (Ara 21:1, 2) Ti Patara ket maikunkuna ita nga isu ti nagkauna a rebrebba iti purok ti Gelemish iti kabambantayan a makin-abagatan a laud a dapnis ti Asia Menor ken adda iti agarup 10 km (6 mi) iti daya ti wangawangan ti Karayan Xanthus (Koca). Dayta ti nagserbi a pagsangladan dagiti barko manipud Italia, Egipto, Siria, ken ti dadduma pay a lugar, ken dayta ti kangrunaan a sangladan dagiti siudad iti igid ti ginget ti Karayan Xanthus.

Iti Aramid 21:1, adda dagiti kadaanan a manuskrito a manginayon iti sasao a “ken Mira” kalpasan ti Patara. No umiso daytoy a panagnayon, ti ngarud barko a nagluganan ni Pablo manipud Mileto ket mabalin a limmasat iti Patara wenno simmanglad sadiay, nga idiay Mira ti immakaranna iti sabali a barangay, saan ket nga idiay Patara.