PEDAIAS

[kaipapananna ti “Nangsubbot ni Jehova”].

1. Ama ni Joel, a bayat ti panagturay ni David isu ti prinsipe ti kagudua ti tribu ni Manases nga agnanaed iti laud ti Jordan.​—1Cr 27:20, 22.

2. Ama ni Zebida nga ina ni Jehoiaquim; nagtaeng ni Pedaias idiay Ruma.​—2Ar 23:36.

3. Maikatlo a nainaganan nga anak ni Ari Jehoiaquin (Jeconias) a nayanak bayat ti pannakaidestiero idiay Babilonia. Ni Pedaias ti ama ni Gobernador Zorobabel (kalpasan ti pannakaidestiero) ket ngarud maysa a napateg a paset ti linia ti kapuonan nga agturong ken Jesus. (1Cr 3:17-19) Gapu iti sumagmamano a di nailanad a kasasaad, naawagan met ni Zorobabel kas anak ni Sealtiel a kabsat ni Pedaias. Mabalin a ni Sealtiel inamponna ni Zorobabel no natay ni Pedaias idi ubing pay ni Sealtiel; wenno, no natay ni Sealtiel sakbay a naaddaan iti anak, mabalin nga inaramid ni Pedaias ti kaugalian a panangasawa iti ipag, a pinutotna ni Zorobabel iti nagan ni kabsatna a Sealtiel.​—Esd 5:2; Mt 1:12.

4. Maysa a Benjamita a ti kaputotanna ket nagnaed idiay Jerusalem kalpasan ti pannakaidestiero idiay Babilonia.​—Ne 11:4, 7.

5. Maysa a kaputotan ni Paros a timmulong ken Nehemias a nangtarimaan iti pader ti Jerusalem.​—Ne 3:25.

6. Maysa nga Israelita a nadakamat kalpasan ti pannakaidestiero, nalabit maysa a padi, a nagtakder iti makannigid ni Esdras bayat ti pannakaibasa ti Linteg ni Jehova kadagiti naguummong nga umili.​—Ne 8:1, 4.

7. Matalek a Levita a dinutokan ni Nehemias bayat ti maikadua nga isasarungkarna iti Jerusalem; nadutokan a kadua ni Selemias a padi ken ni Sadok a managkopia tapno aywananda ti naikontribusion nga apagkapullo.​—Ne 13:6, 7, 12, 13.