PENUEL

[Rupa ti Dios].

1. “Ama ni Gedor” a kameng ti tribu ni Juda. (1Cr 4:1, 4) Yantangay agparang ti Gedor kas nagan ti maysa nga ili iti Juda, mabalin a ni Penuel ti nagtaudan dayta wenno ti inapo dagiti agnanaed iti dayta.

2. Ulo ti pamilia iti tribu ni Benjamin a nagnaed idiay Jerusalem; anak ni Sasac.​—1Cr 8:1, 25, 28.

3. Maysa a siudad iti abagatan ti Jaboc. Idi tiempo ti Uk-ukom, nagkiddaw ni Gideon iti taraon kadagiti lallaki ti Penuel tapno makapagtultuloy dagiti puersana a mangkamat iti ar-ari ti Midian, ngem saan a nangted dagiti Penuelita. Dayta ti makagapu a dinadael ni Gideon ti torreda idi agangay ket pinapatayna dagiti amin a lallakida. (Uk 8:4-9, 17) Awanen ti nadakamat pay maipapan iti Penuel agingga idi ‘binangon’ manen dayta ni Ari Jeroboam I, wenno sinarikedkedanna laeng dayta.​—1Ar 12:25.

Gagangay a maikunkuna a ti Penuel ket isu ti Tulul edh-Dhabab esh-Sherqiyeh, agarup 6 km (3.5 mi) iti daya ti Succot ken iti asideg ti Jaboc a 14 km (8.5 mi) wenno nasursurok pay iti amianan a daya, a sadiay nga agsabet ti Jaboc ken Jordan. Adda dagiti ebidensia a nabileg ti pannakasarikedked dayta ken nasayaat ti nagsaadanna agsipud ta maiturayanna ti pagserkan ti baw-ang ti Jaboc nga agpalaud a sumalog iti Jordan.​—Kitaenyo ti PENIEL.