SUCCOT
[Dagiti Abong-abong].
1. Maysa a lugar a nagsabatan da Esau ken Jacob. Kalpasan dayta a panagsabatda, nangibangon sadiay ni Jacob iti balay ken nangaramid kadagiti abong-abong, wenno nalinongan a kuadkuadra, maipaay iti pangenna; sipud idin napanaganan dayta a lugar iti Succot. (Ge 33:16, 17) Ti sasao a ti Siquem (simmaruno a disso a nagsardenganna) ket “adda iti daga ti Canaan” ipasimudaagna a ti Succot awan iti mismo a Canaan.—Ge 33:18.
Ti dadduma pay a pannakatukoy ipasimudaagda met nga adda dayta iti dayaen ti Karayan Jordan, yantangay nalabit maymaysa a lugar ti tuktukoyen dagitoy. Gapuna, a nadakamat ti Succot kas maysa kadagiti siudad iti tawid ti tribu ni Gad, iti daya ti Jordan. (Jos 13:24, 25, 27) Idi kamkamaten ni Gideon dagiti natda kadagiti puersa dagiti Midianita, binallasiwna ti Jordan ket dimteng iti Succot, a sadiay pinagkedkedan dagiti prinsipe ti siudad ti kiddawna a taraon maipaay iti buyotna, a kasta met ti inaramid dagiti lallaki iti kabangibang a Penuel. Idi agsublin ni Gideon, innala ti nagnagan ti 77 a prinsipe ken lallakay ti Succot (mangipasimudaag a dakkel dayta a siudad) ket dinusana ida gapu ta saanda a sinuportaran iti imbilin ti Dios a namilitariaan a tignay. (Uk 8:4-16) Idi imbangon ni Solomon ti templo, dagiti alikamen a gambang ket nasukog idiay Distrito ti Jordan, iti nagbaetan ti Succot ken Zaretan.—1Ar 7:46.
Maitunos kadagitoy a pannakatukoy, adu ti mangikuna a ti Succot ket isu ti maysa a lugar iti asideg ti Tell Deir ʽAlla (maawagan ita iti Sukkot) wenno iti asidegna, agarup 5 km (3 mi) iti daya ti Karayan Jordan ken iti amianan laeng ti Jaboc iti lugar a rummuaranna manipud turturod. Mabalin a nataginayon ti orihinal a naganna iti kabangibang a Tell el-Ekhsas, ta dayta ti katupag ti Hebreo a Succot no iti Arabiko. Matannawagan ti Tell Deir ʽAlla ti maysa a nadam-eg a tanap a mabalin nga isu ti “nababa a tanap ti Succot” a nadakamat iti Salmo 60:6; 108:7.
2. Ti damo a disso a nadakamat a nagsardengan dagiti Israelita idi agturongda iti Nalabaga a Baybay. (Ex 12:37) Yantangay agpada a saan nga ammo ita ti ayan ti Rameses (nangrugian ti panagmartsada) ken ti Etam (nagpakarsuanda kalpasan ti Succot), saan met a masigurado ti ayan ti Succot. (Ex 13:20) Nupay kasta, ti laeng ammo maipapan iti Succot ket nabatad nga agarup maysa nga aldaw a panagdaliasat (32 agingga iti 48 km; 20 agingga iti 30 mi) manipud iti Let-ang ti Etam, a maipagarup a dumanon iti makin-amianan a laud a deppaar ti Peninsula ti Sinai.