PERES, II

Inaramat ni Daniel daytoy nga Aramaiko a sao idi impaulogna ti surat ti ima iti diding a “MENE, MENE, TEKEL ken PARSIN.” (Da 5:25, 28) Kunaen ni Dr. Judah Slotki a ti surat ti ima kaipapananna ti “maysa a mane, maysa a mane, maysa a siklo ken kagudua a siksiklo.” (Soncino Books of the Bible, inurnos ni A. Cohen, London, 1951; kitaenyo met ti Peake’s Commentary on the Bible, inurnos da M. Black ken H. H. Rowley, London, 1964, p. 596.) Yantangay ti “Peres” ket pangmaymaysa a porma ti “Parsin,” kaipapananna ti “kagudua a siklo.”

Idi imbuksilan ti mammadto ti kaipapanan ti “Peres,” nagaramat iti dua a sabali pay nga Aramaiko a sasao nga addaan iti kasta met laeng a tallo a konsonante ngem naiduma ti pannakaibalikasda. “PERES [Peresʹ], ti pagariam nabingbingayen [peri·sathʹ] ket naited kadagiti Medo ken kadagiti Persiano [u·Pha·rasʹ].” Ngarud ti naipaltiing a pannakailawlawag ramanenna ti dua a sao a doble ti kaipapananna a “Peres” ken ti ramut a sao a kaipapananna ti “bingayen.” Ti simmaganad a paspasamak iti dayta a rabii paneknekanda nga umiso ti naited a kayuloganna.​—Kitaenyo ti PARSIN.