PEREZ

[Pannakapisang; Pannakapisang ti Puerta].

Maysa kadagiti singin nga annak ni Juda nga impasngay kenkuana ni Tamar a manugangna a babai. Idi maipasngayda, ni Zera a kasingin ni Perez inrugina ti rummuar nga umun-una ngem nagsanud, isu a ni Perez ti immuna a rimmuar, a nakaigapuan ti pannakapisang ti puerta ni Tamar. (Ge 38:24-30) Nagtalinaed a ni Perez ti umun-una ngem iti kabsatna ken kanayon nga umuna a nailista, ken nagbalin a nalatlatak ti sangakabbalayanna. (Ru 4:12) Ni Perez ken ti dua nga annakna, da Hezron ken Hamul, ket nailista a karaman iti linia ti kaputotan ni Jacob a napan idiay Egipto, a sadiay isuda a tallo ket nagbalin a pannakaulo ti tunggal pamilia iti Juda. (Ge 46:8, 12) Malaksid iti daytoy, awanen ti impormasion a nairekord maipapan kenkuana.

Dagiti pannakadakamat ni Perez ket kangrunaanna a nainaig iti listaan ti kaputotan, a ti kaaduan kadagiti kaputotan ni Juda ket matunton babaen ken Perez. (1Cr 2:4, 5, 9-55; 4:1-20) Dagiti pamilia ni Perez ken ti dua nga annakna ti mangbukel iti dakkel a paset ti tribu ti Juda idi maikadua a panagpasalista idiay let-ang. (Nu 26:20-22) Ti dadduma kadagiti kaputotan ni Perez ket addada iti umuna a benneg ti binulan nga armada ni David. (1Cr 27:3) Adu kadagiti annak ni Perez ti nagsubli manipud pannakaidestiero idiay Babilonia, ket 468 kadakuada ti nagtaeng idiay Jerusalem. (1Cr 9:3, 4; Ne 11:4, 6) Ti direkta a linia ti kapuonan manipud ken Perez ket dimmalan ken Boaz agingga ken David ket kamaudiananna dimmanon ken Jesus a Mesias.​—Ru 4:18-22; 1Cr 2:4-15; Mt 1:3; Lu 3:33.