PISTASIO, BUNGA TI

[Heb., bot·nahʹ].

Ti bunga ti kayo a Pistacia vera. Daytoy a kayo nga agregreg ti bulbulongna iti otonio siwawadwad nga agtubo kadagiti namaga a lugar ken manmano a dumanon iti katayag a nasurok a 9 m (30 pie). Agrukod dagiti bungana iti kaatiddog a 1.5 agingga iti 2 cm (0.6 agingga iti 0.8 pul.) ken agtaruboda iti dadakkel a raay. Ti naingpis, ngem natangken, nakusnaw ti marisna nga ukis dagiti naluom a bunga ti pistasio ket nabungon iti panguribetbeten a bunot. Tunggal bunga aglaon iti maysa a duyaw-berde a bagas a napalikmutan iti naingpis a lumabaga nga ukis. Ti bagasna addaan iti kalkalainganna, nasam-it a raman ken gagangay a makan a di naluto wenno naikirog. No dadduma mapilpil dagiti bagas maipaay iti lana, ket dagiti nagiling a bagas maus-usar kadagiti sinam-it.

Karaman ti bunga ti pistasio kadagiti “kasayaatan a bunga ti daga” ti Canaan nga inyeg ti annak ni Jacob kas sagut nga agpaay iti daydiay agturay idi iti Egipto. (Ge 43:11) Uray kadagiti agdama a tiempo, nakaad-adu a bunga ti pistasio ti maipapaangkat manipud paspaset ti Makintengnga a Daya.

Agparang a ti nagan ti siudad a Betonim nga adda iti dayaen ti Jordan iti teritoria ti Gad ket naipasurot iti nagan dagiti bunga ti pistasio.​—Jos 13:24, 26.