ALAMO, NAAPRES A GINGET DAGITI

Iti Isaias 15:7, ti mammadto desdeskribirenna dagiti agtaltalaw a Moabita kas pumampanaw a bumallasiw iti “naapres a ginget dagiti alamo” nga awitda dagiti sanikuada. No ti panagtalawda ket agpaabagatan, a nalabit kasta ti inaramidda, daytoy a naapres a ginget ket agparang a tumukoy iti “naapres a ginget ti Zered” (Nu 21:12; De 2:13), a nagserbi kas beddeng ti Moab ken Edom iti abagatan. Ti naapres a ginget ti Zered ket gagangay a maikunkuna nga isu ti Wadi el-Hasaʼ, nga agayus nga agturong iti makin-abagatan nga ungto ti Natay a Baybay. Ti makimbaba nga ayusna ket lumasat iti maysa a bassit a tanap a medio nalutulot iti sumagmamano a disso isu a maikanatad a pagtubuan dagiti alamo.​—Kitaenyo ti ZERED, NAAPRES A GINGET TI.