NAAPRES A GINGET

Ti Hebreo a sao a naʹchal ket mabalin a tumukoy iti ginget nga ayan ti maysa a waig (Ge 26:19; 2Ar 3:16; Job 30:6; Sol 6:11) wenno ti waig a mismo. (1Ar 17:4; Sal 110:7) Kastoy ti kuna ni A. P. Stanley iti librona a Sinai and Palestine (1885, p. 590) maipapan iti sao a naʹchal: “Awan ti sao nga Ingles nga eksakto a katupagna, ngem nalabit ti kaasitgan ket ti ‘lansad a ginget (torrent-bed).’” Ti maysa kadagiti kayuloganna nga inlanad ti Hebreo ken Aramaiko a leksikon da Koehler ken Baumgartner ket ti “naapres-a-ginget.” (Lexicon in Veteris Testamenti Libros, Leiden, 1958, p. 607) Ti termino a “wadi” (Arabiko) ket naaramat met a pangawag iti naapres a ginget.​—Ge 32:23, Rbi8 ftn.

Nadeskribir ti Naikari a Daga kas “maysa a daga dagiti naapres a ginget ti danum, dagiti ubbog ken dagiti nadanum a yuyeng nga agayus iti ginget a tanap ken iti nakabambantay a rehion.” (De 8:7) Aggapgapu kadagiti ubbog ti danum ti sumagmamano kadagiti waig isu a saan a maab-abbatan dagitoy, idinto ta ti dadduma ket pagay-ayusan laeng ti napegges a danum no tiempo ti panagtutudo ngem nakamagmaga unay dagita no awan ti tudo. (1Ar 17:7; 18:5) Impadis ti matalek a ni Job dagiti nagulib a pannakilangen kenkuana ti kakabsatna iti maysa nga ayus iti kalam-ekna a maatianan iti kalgaw.​—Job 6:15.

Dagiti naapres a ginget a nadakamat iti Biblia ket karaman ti Araba (Am 6:14), Arnon (De 2:36), Besor (1Sm 30:9), Kerit (1Ar 17:3), Egipto (Jos 15:4), Escol (Nu 13:23) Gerar (Ge 26:17), Jaboc (De 2:37), Kana (Jos 16:8), Kidron (2Sm 15:23), Kison (Uk 4:7), Sorec (Uk 16:4), ken Zered (De 2:13; kitaenyo dagiti naapres a ginget sigun kadagiti naganda). Ti dadduma pay a naapres a ginget a saan a nadakamat nupay kangrunaan a wawaig ti Jordan ket isu ti Yarmuk ken ti Farʽah.