MANAGANI, PANAGANI
Idi un-unana, maar-aramid ti panagani iti bukbukel babaen ti pananggapas iti puonna babaen ti kumpay (De 16:9; Mr 4:29), wenno no dadduma babaen ti panangbag-ut iti dayta manipud iti daga. No maaramid babaen ti panangbag-ut, maparut a mairamut ti intero nga ungkay manipud iti daga. Napateg daytoy iti natikag a dagdaga a sadiay narasay ti garami ken saan a makadakkel unay dagiti mula a bukbukel.
Ti kadaanan a kumpay ket naaramid manipud kayo wenno tulang ken namontaran kadagiti pamulinawen kas pannakatademna. Idi agangay, naaramat ti ad-adda a pagaammo a nagsikkubeng a metal a tadem. Ti managani petpetanna ti puon ti mula babaen ti maysa nga imana sana gapasen babaen ti maysa pay nga imana.
Nabilin dagiti Israelita a saanda a gapasen dagiti adda iti igid dagiti talonda. Imbes ketdi, mangibatida iti sangkabassit nga aanien “maipaay iti daydiay naparigatan ken iti ganggannaet nga agnanaed.” (Le 19:9, 10) No nagapasen, maummong dayta, mareppet iti binettek, sa maisalansan, nalabit iti pagirikan.—Ge 37:6, 7; Ru 3:6, 7.
Piguratibo nga Usar. Iti Kasuratan, ti panagani ket masansan a naaramat iti piguratibo a pamay-an a mangiladawan iti resulta dagiti trabaho ti maysa, naimbag man wenno dakes. Kastoy ti kuna ti nadibinuan a prinsipio “aniaman nga imulmula ti maysa a tao, daytoyto met ti apitenna.” Nupay daydiay agimulmula a maipaay iti lasag apitenna ti panagrupsa manipud iti dayta, impakita ni Pablo a “ti agimulmula maipaay iti espiritu apitennanto ti agnanayon a biag manipud iti espiritu,” ken impasiguradona kadagiti Kristiano a taga Galacia nga agapitda no saanda a mabannog. (Ga 6:7-9; Pr 22:8; Os 8:1, 7) Idi pinaregtana dagiti taga Corinto a mangipakitada iti Nakristianuan a kinamanagparabur kadagiti marigrigat a kapammatianda idiay Judea, kinuna kadakuada ti apostol: “Ti agmula a siiimut aganinto met a siiimut; ket ti agmula a siwawadwad aganinto met a siwawadwad.”—2Co 9:5-7.
Imbaon ni Jesu-Kristo a mapan ‘agani’ dagiti adalanna, nga ipasimudaagna nga urnongenda dagidiay mangipangag kas ad-adalanna. (Jn 4:35-38) Sigun iti pangngarig ni Jesus maipapan iti simboliko a “trigo” ken “dakes a ruot,” iti “panungpalan ti sistema ti bambanag,” ti Anak ti tao ibaonna dagiti agani nga anghelna tapno “ummongendanto manipud iti pagarianna ti amin a bambanag a mamataud iti pannakaitibkol ken dagiti tattao nga agar-aramid iti kinakillo.” Dagitoy a “dakes a ruot” (ti “annak daydiay nadangkes”) ket maipuruak iti piguratibo nga umap-apuy nga urno, idinto ta “dagiti trigo” (“ti annak ti pagarian”) maitalimeng ken “agsilnagdanto a siraraniag a kas iti init iti pagarian ni Amada.”—Mt 13:24-30, 36-43.
Impakita ti sirmata ni Juan iti Apocalipsis a daytoy a trabaho a panagani ken panamaglalasin ket iwanwanwan ti naipadayag ken naitrono a ni Jesu-Kristo, nga iti dayta a sirmata nailadawan ni Kristo kas maysa a “kaasping ti anak ti tao, nga adda nabalitokan a korona iti ulona ken maysa a natadem a kumpay iti imana.” Kas sungbat iti pukkaw ti anghel nga, “Iserrekmo ta kumpaymo ket aganika, agsipud ta dimtengen ti oras a panagani, ta ti anien iti daga naan-anayen a natangkenan,” nakita ni Juan nga “imparaspasna ti kumpayna iti daga, ket ti daga nagapasan.” Napaliiw ti apostol a kalpasan dayta, “ti ubas ti daga” ket naurnong sa naipuruak iti “dakkel a pagpespesan iti ubas ti unget ti Dios.”—Apo 14:14-20; idiligyo ti Apo 19:11-16.