Agmulmulakayo Aya a Siwawadwad?
1 Nakuna ni apostol Pablo iti 2 Corinto 9:6: “Ngem no maipapan iti daytoy, ti agmula a siiimut aganinto met a siiimut; ket ti agmula a siwawadwad aganinto met a siwawadwad.” Nangruna a pudno daytoy iti panagdayawtayo. No kasano ti kawadwad ti tiempo ken pinget nga agsagana iti gimong ken mangikasaba iti damag ti Pagarian, lalo met nga rumang-aytayo iti naespirituan. Ngem no nakirmet wenno tungpal bilin iti panagaramidtayo, nabannayat ti progresotayo. Agmulmulakayo aya a siwawadwad?
2 Personal a Panagadal ti Biblia: Tapno nabungatayo a ministro, masapul nga agmulatayo ti nawadwad iti personal a panagadaltayo. (Sal. 119:97, 105; Mat. 5:3) Gapu iti kumikom ti inaldaw a panagbiag, kasapulan ti pinget iti panagbalin a sipupuot iti espiritual a kasapulantayo. Masansan a kasapulanna “a gatangenyo ti nainggundawayan a tiempo.” (Efe. 5:16) Sapaen dagiti dadduma ti bumangon iti masinunuo nga aldaw wenno irantada ti dadduma a rabii a maipaay iti personal a panagadal. Iti ania a wagas nga aganitayo iti nawadwad? Magun-odtayo ti nabilbileg a pammati, narimrimat a namnama, ken naragragsak a sukog ti panunot.—Roma 10:17; 15:4; 1 Ped. 1:13.
3 Dagiti Gimong ti Kongregasion: Iti Salmo 122:1, nakuna ni David: “Nagrag-oak idi a kinunada kaniak: ‘Mapantayo idiay balay ni Jehova.’” Kasta met aya ti mariknayo? Ti panagmula ti nawadwad kayatna a sawen ti regular nga itatabuno kadagiti lima a gimongtayo. Ikeddeng ti panunotyo a saanyo a palubosan a ti dakes a panniempo ti manglapped kadakayo. No kasano ti kaadu iti lapped a maparukmatayo, kasta met ti kaadu ti bendisiontayo.
4 Sumangpetkayo a nasapa ken makiramankayo iti makaparegta a saritaan kadagiti kakabsatyo. Isaganayo a naimbag iti Panagadal ti Pagwanawanan tapno makaimulakayo ti nawadwad babaen ti panagkomentoyo. Babaen ti “sibubuslon a panangsibug” iti sabsabali kadagiti gimong, dakayo met ti “masibugan a sibubuslon.”—Prov. 11:25.
5 Tay-ak ti Ministerio: Ti kaadu iti tiempo a maideboto iti tay-ak ti ministerio, kasta met ti kaadu ti maapit a makapainteres a kapadasan, nabunga a sarungkar, ken nabunga a panagadal ti Biblia.
6 Ti panagmula a siwawadwad kaipapananna ti panangparang-ay iti kalidad agraman ti kantidad. Ti ekselente a katulongan a mangparang-ay ti kalidad iti ministeriotayo isu ti Panakirinnason a libro. Idiay pinanid 9-15 adda nasurok a 40 nga introduksion a nangsaklaw iti 18 a suheto a tumulong a mangtukay ti interes kadagiti ruangan. No makasarakkayo ti interes, siguruenyo a sarungkaran ken apiten iti bunga dagiti mulayo. Manamnama a ti regtayo ket mangiturong iti panagadal ti Biblia.
7 No agmulatayo iti nawadwad, namnamaentayo ti ad-adu a bendision manipud ken Jehova.—Mal. 3:10.