Aglaplapusanan a Bendision ti Itden ti Panagmula a Siwawadwad
1 Segseggaantay amin ti pannakatungpal dagiti naindaklan a kari nga adda iti Sao ti Dios. Uray pay itan, mangipapaay ni Jehova iti adu a bendision a mangparagsak iti biagtayo. Ngem masapul nga aramidentayo ti amin a kabaelantayo tapno naan-anay a magunggonaantayo. Kas kinuna ni apostol Pablo, “ti agmula a siwawadwad aganinto met a siwawadwad.” (2 Cor. 9:6) Usigentayo ti dua a benneg a pagaplikaran daytoy a prinsipio.
2 Ti Personal a Ministeriotayo: Adu a bendision ti iyeg ti panangiranud iti naimbag a damag kadagiti tattao no addaantayo iti gundaway a mangpaneknek. (Prov. 3:27, 28) Nagsayaaten ta adu dagiti agmulmula a siwawadwad babaen ti panangpalawada iti ministerioda, a pakairamanan ti panag-auxiliary wenno panag-regular pioneer-da. Mabalintay amin ti agmula a siwawadwad babaen ti sipapasnek a panagsarungkar tapno maparayray ti interes dagiti amin nga interesado a nasarakantayo ken babaen ti panangitukon iti panagadal iti Biblia no adda gundaway. (Roma 12:11) Ti panagreggettayo kadagitoy a pamay-an ket agresulta kadagiti makapabileg a kapadasan ken parayrayenna ti rag-otayo iti ministerio.
3 Panangsuporta iti Pagarian ti Dios: Adda iti panunot ni Pablo ti panangted kadagiti material a banag idi dinakamatna ti maipapan iti ‘panagmula a siwawadwad.’ (2 Cor. 9:6, 7, 11, 13) Adu ita ti mabalintay nga aramiden iti pisikal ken material a pamay-an tapno masuportarantayo ti Pagarian. Mabalintay ti tumulong iti pannakaibangon dagiti Kingdom Hall ken Assembly Hall. Mabalintay met ti makiraman iti panangdalus ken panangmantener kadagita a lugar maipaay iti pudno a panagdayaw. Kanayonanna, mabalintay ti agkontribusion iti pinansial para kadagiti paggastuan ti kongregasiontayo agraman iti sangalubongan a trabaho a panangikasaba iti Pagarian ken panangaramid kadagiti adalan. Bayat nga ar-aramidentayo ti pasettayo, anian a ragsaktayo a makakita iti aglaplapusanan a panangbendision ni Jehova iti daytoy a trabaho nga imbilinna!—Mal. 3:10; Luc. 6:38.
4 Paregtaennatayo ti Sao ti Dios nga ‘agaramid iti naimbag, agbalin a nabaknang iti nasayaat nga ar-aramid, agbalin a naparabur, sisasagana a mangiranud.’ No ipangagtayo dayta a pammagbaga, masagraptayo ita dagiti nabaknang a bendision. Maysa pay, ‘sitatalged nga agur-urnongtayo maipaay iti bagbagitayo iti nasayaat a pamuon maipaay iti masanguanan ken iti pudpudno a biag.’—1 Tim. 6:18, 19.