REFIDIM

[nagtaud iti sao a kaipapananna ti “agwaras”; wenno, “pabang-aran”].

Maysa kadagiti disso a nagkampuan dagiti Israelita iti panagdaliasatda manipud Nalabaga a Baybay nga agturong iti Bantay Sinai. Apaman a pimmanawda iti Let-ang ti Sin, nagpakarsoda idiay Dofca, kalpasanna idiay Alus, ket kamaudiananna idiay Refidim. (Ex 17:1; Nu 33:12-14) Gapu ta awan ti danum idiay Refidim, nagreklamo dagiti umili ken rinirida ni Moises. Imbilin ti Dios a mangikuyog ni Moises iti sumagmamano a lallakay a mapan “iti bato ti Horeb” (nabatad a ti kabambantayan a rehion ti Horeb, saan a ti Bantay Horeb) ket impang-or ni Moises ti sarukodna iti maysa a bato. Nagayus ti danum a nalawag a dimmanon kadagiti umili a nagkampo idiay Refidim.​—Ex 17:2-7.

Rimmaut dagiti Amalekita kadagiti Israelita idiay Refidim, ngem iti panangidaulo ni Josue iti pannakirupak ti ili ti Dios, naparmek dagiti rimmaut. (Ex 17:8-16) Sigun iti panagsasaganad ti pasamak iti salaysay, adda idi dagiti Israelita idiay Refidim idi inyeg ti katugangan ni Moises ti asawana a ni Zipora ken ti dua nga annakna; ket insingasing ti katuganganna a pumili iti papanguluen a tumulong a mangukom kadagiti umili.​—Ex 18:1-27.

Saan a masinunuo ti eksakto nga ayan ti Refidim. Ti nadumaduma a lugar nga ibagbaga dagiti geograpo ket maibatay iti ammoda a ruta a dinaliasat dagiti Israelita manipud Let-ang ti Sin nga agturong iti Bantay Sinai. Kunaen ti adu a moderno a geograpo a ti Refidim ket isu ti maysa a disso idiay Wadi Refayied, nga asideg iti amianan a laud ti nabayagen a maikunkuna nga ayan ti Bantay Sinai. Iti kaparanget ti nadam-eg a disso ti Refayied, adda turod a kasta met laeng ti naganna, a mabalin a sadiay ti nagtakderan ni Moises a nakangato dagiti takiagna bayat ti pannakigubatda kadagiti Amalekita.