HOREB

[Namaga; Langalang].

Ti “bantay ti pudno a Dios,” nalawag nga isu met laeng ti Bantay Sinai. (1Ar 19:8; Ex 33:6) Nupay kasta, kadawyan a ti Horeb ket kasla tumukoy iti kabambantayan a rehion iti aglikmut ti Bantay Sinai, a naawagan met iti Let-ang ti Sinai.​—De 1:6, 19; 4:10, 15; 5:2; 9:8; 18:16; 29:1; 1Ar 8:9; 2Cr 5:10; Sal 106:19; Mal 4:4; idiligyo ti Ex 3:1, 2; Ara 7:30; kitaenyo ti SINAI Num. 1 ken 2.

Idiay Horeb, nagparang ken Moises ti anghel ni Jehova iti tengnga ti sumsumged a siitan a bassit a kayo, a nangdutok kenkuana nga idauluanna ti Israel a rummuar manipud Egipto. (Ex 3:1-15) Idi agangay, bayat nga addada idiay Refidim, nagreklamo dagiti nawayawayaan nga Israelita maipapan iti kaawan ti danum nga inumenda. Gapuna, iti bilin ni Jehova, napan ni Moises a kaduana ti dadduma kadagiti lallakay ti Israel iti maysa a bato idiay Horeb, nabatad nga isu ti kabambantayan a rehion ti Horeb, ket impang-orna ti sarukodna iti bato. Simimilagro a nangrugi nga agayus ti danum manipud itoy a bato. (Ex 17:1-6; idiligyo ti Sal 105:41.) Kalpasanna ti sumagmamano a siglo, nagtalaw ni mammadto Elias manipud ken managibales a Reyna Jezebel nga agturong iti Horeb a dimmalan iti Beer-seba.​—1Ar 19:2-8.