REGIO

Maysa a siudad iti makin-abagatan nga Italia a maawagan ita iti Reggio wenno Reggio di Calabria. Ti barko a nagluganan ni apostol Pablo kas balud ket nagsardeng iti Regio idi mapan dumatag iti saklang ni Cesar idiay Roma, idi agarup tawen 59 K.P.

Masarakan ti Regio iti Lipit ti Messina, a mamagsina iti Italia ken Sicilia. Iti amianan laeng ti Regio, ti barko a nagluganan ni Pablo ket kasapulan a lumabas iti dimmawadaw a daga ti Scylla iti Italia ken iti alikuno a Charybdis iti Sicilia, nga agpada nga imbilang dagiti nagkauna a marino kas napeggad. Maysa nga aldaw kalpasan ti isasangpetda idiay Regio, timmaud ti puyupoy ti angin nga aggapu iti abagatan ket daytoy ti nangiduron kadakuada; iti kasta nalasatanda a sitatalged ti lipit ken nagturongda idiay Puteoli iti amianan nga amianan-a-laud.​—Ara 28:13.